࿐གནོད་སྦྱིན་ཆེན་པོ་ལ་ཡིད་ཆེས་ཡོད་པ་དང་། ང་ལ་དད་འདུན་ཡིན་མཁན་སློབ་ཚོགས་སུ་ཡིན་ཡང་། དྲྭ་འདི་མཐོང་མ་ཐག་ཏུ་དབང་ལུང་གཉིས་ཀ་ལྷན་དུ་ཐོབ་ངེས་ཡིན། གཏེར་ཆེན་བླ་མས་ལུང་གི་ཟིན་པ། མ་ཟད་གཏེར་ཆེན་བླ་མའི་དངོས་སློབ་དཔལ་ཡུལ་མཆོག་སྤྲུལ་དབང་ཆེན་དགྱེས་པའི་རྡོ་རྗེ་ནས་འདི་ལྟར་དུ་སྤྲིངས། ཀུན་གྱིས་གོ་བར་བགྱིས་ཤིག བོད་ཟླ་ ༧ ཚེས་ ༢༢ པའི་སྔ་དྲོའི་ཆར་ཐཻ་ཙོང་རང་ཁྱིམ་བདེ་ཆེན་འབར་བ་ནས།
༈ གནོད་སྦྱིན་བཙན་རྒོད་འབར་བའི་གསོལ་མཆོད་ནི།
ཀྱེ། པདྨ་དབང་གི་བཀའ་སྡོད་ཆེ། །
བཙན་རྒོད་འབར་བ་མཆེད་བདུན་པོ། །
དྲེགས་པ་སྡེ་བརྒྱད་ཚོགས་དང་བཅས། །
མ་ཐོགས་མྱུར་དུ་ད་ཚུར་གཤེགས། །
དམར་ཆེན་གཏོར་མ་སྨན་རག་བཅུད། །
དགྲ་བོའི་ཤ་ཁྲག་རྐང་རུས་ཀླད། །
དཔའ་སྐྱེམས་ལོངས་སྤྱོད་བསམ་མི་ཁྱབ། །
མཁའ་དབྱིངས་གང་བའི་མཐུན་རྫས་ཀྱིས། །
གསོལ་ལོ་མཆོད་དོ་དགྱེས་པར་རོལ། །
ཐུགས་དམ་བསྐང་ལ་ཉམས་ཆག་བཤགས། །
བསྟན་དགྲའི་ཤན་པར་མངའ་གསོལ་ལོ། །
སྔོན་གྱི་ཐ་ཚིག་ཇི་བཞིན་ཏུ། །
རྣལ་འབྱོར་ལས་དང་གྲིབ་ལྟར་འགྲོགས། །
འགལ་རྐྱེན་གནོད་པའི་རིགས་རྣམས་སོལ། །
མཐུན་རྐྱེན་བསམ་རྒུ་ཡིད་བཞིན་སྒྲུབས། །
རྟག་ཏུ་གདོང་གྲོགས་མེལ་ཚེ་མཛོད། །
ཁྱད་པར་ཡིད་ལ་བརྣག་པའི་དོན། །
གསང་ཆེན་བསྟན་དང་བསྟན་འཛིན་ལ། །
ལོག་པར་འཁུ་བའི་བདུད་དགྲའི་རིགས། །
གང་ཡིན་ཁྱེད་རྣམས་ཟས་སྐལ་དུ། །
གཏད་པ་ཡིན་ནོ་ཤོར་ར་རེ། །
སྐད་ཅིག་ཉིད་ལ་རྔམས་ཟས་ཀྱིས། །
ངེས་གསང་སྙིང་པོའི་རིང་ལུགས་ཀྱི། །
མངའ་ཐང་ཡོན་ཏན་དགུང་དུ་སྤོར། །
ཕྱོགས་ལས་རྣམ་རྒྱལ་རུ་མཚོན་ཕྱོར། །
མ་གཡེལ་མ་འགྱངས་ས་མ་ཡ། །
ཞེས་པ་འང་ཉིང་འཁྲུལ་དུ་མི་དམར་བརྗིད་ཅན་ཁ་ཤས་བྱུང་ནས་ངེད་ཚོ་དཀའ་ལས་ཆེ་ཤོས་རྒྱག་མཁན་ཡིན་ཀྱང་ཅུང་སྣང་ཆུང་གནང་གི་མེད་དམ་ཞེས་མ་རངས་བའི་གཏམ་ཟུར་སྒྲ་བ་ཞིག་རྨིས་པས་དེ་འཕྲལ་འདི་ཉིད་བྲིས་ཏེ་བསྐང་གསོལ་བཏང་བས་ངོ་སོ་ཐོན་པའི་སྣང་བ་འང་བྱུང་ཞེས་འཇིགས་བྲལ་ཡེ་ཤེས་རྡོ་རྗེས་སོ། །