ཞལ་གདམས་ཡང་ཡིན་ལ་ལུང་བསྟན་ཡང་ཡིན།
༄། །ཆོས་རྗེ་ཡིད་བཞིན་ནོར་བུ་མཆོག་གི་འདའ་ཁའི་ཞལ་ཆེམས། རང་ཚུགས་མ་འཆོར། གཞན་སེམས་མ་དཀྲུགས། ཞེས་གསུང་བའི་གདམས་པ་ཚིག་རྐང་གཉིས་པོ་འདི་སྤྱིར་བཏང་གི་ཞལ་ཆེམས་ཙམ་ཞིག་མིན་པར། དུས་སུ་བབས་པའི་ཆར་དང་། སྐབས་སུ་བབས་པའི་ལུང་བསྟན་ཞིག་ཀྱང་ཡིན་པས། འདི་ལ་རང་གིས་གོ་དོན་རྙེད་ཚོད་ལྟར་ཅུང་ཟད་ཞུ་ན།
དང་པོ། རང་ཚུགས་མ་འཆོར་གསུངས་པའི་དོན།
རབ་ཡིན་ན། རྐྱེན་བཟང་ངན་ཅི་ལ་འཕྲད་ཀྱང་དེའི་དབང་དུ་མི་འགྲོ་བར་རྣམ་རྟོག་གང་ཤར་རྗེས་མེད་རང་གྲོལ་དུ་བཏང་ནས། རིག་པའི་རང་ཚུགས་མ་ཤོར་བ་ཞིག་དགོས་ཞེས་པའི་དོན་དང་། འབྲིང་ཞིག་ཡིན་ན། ཆོས་ཀྱི་རྗེ་ཉིད་ཀྱི་ཞལ་ནས། ལས་ཀྱི་མེ་ཏོག་ཕོག་པའི་ལྷ་སྐལ་དེ་ཟུངས་ལ།།
ཞེས་གསུངས་པ་བཞིན། རིག་འཛིན་བརྒྱུད་པའི་རང་ལུགས་གསེར་ཞུན་མ་ལྟ་བུ་དེའི་ཐུན་མིན་འགྲོ་སྟངས་ཀྱི་ཚུགས་མ་ཤོར་བའི་རྨང་གཞིའི་སྟེང་ནས། རང་རང་གིས་ཁས་བླངས་པའི་སྡོམ་དང་དམ་ཚིག་རྣམས་ཚུལ་བཞིན་དུ་བསྲུངས་ནས་རང་གིས་རང་ལ་མི་ཁྲེལ་བ་ཞིག་དགོས་ཞེས་པའི་དོན་དང་།
ཐ་མ་ཞིག་ཡིན་ན། དམིགས་བསལ་དོན་ཆེན་འདྲ་ཡོད་ན་མ་གཏོགས་རང་གི་སྐྱོན་ཡོན་ཏན། ཐ་ན་ཟ་འཐུང་བྱས་པ་དང་། གཅིན་སྐྱག་དོར་བ་ཚུན་ཆོད་དྲྭ་ཐོག་ནས་ཁྱབ་སྤེལ་མི་བྱེད་པར། རང་ཉིད་སྦས་པའི་ཚུལ་གྱིས་བརྟན་པོ་སྡོད་ཐུབ་པ་ཞིག་དགོས་ཞེས་པའི་དོན་ཡིན།
གཉིས་པ། གཞན་སེམས་མ་དཀྲུགས་གསུངས་པའི་དོན་ནི།
མཁས་བླུན་སུ་ཡིན་རུང་། གཞན་སྐྱོན་བརྗོད་པ། མཚང་འབྲུ་བ། མིང་ངན་འདོགས་པ། དཔེར་ན། ཕུང་གསུམ་པ། སྡུག་ཐུག་སྔགས་པ། གཞན་ཡང་དགེ་སྦྱོང་མགོ་རེག་དང་། ཁྱི་དང་འདྲ་བ། ཕག་དང་འདྲ་བ་སོགས་གཞན་དོན་དུ་མི་འགྱུར་བའི་ངན་སྨྲས་སྣ་ཚོགས་མ་བྱེད་ཅེས་པའི་དོན་རེད། འདི་ལྟ་བུའི་རྡོ་རྗེའི་གསུང་གི་དོན་གོ་དགོས་རྒྱུ་ནི་ཧ་ཅང་གལ་ཆེན་རེད། དེས་ན་འདི་ནི་ཞལ་ཆེམས་ཞིག་ཡིན་པའི་ངོས་ནས། འགྲོ་བ་མི་ཡོད་དོ་ཅོག་གིས་བསྒྲུབ་འོས་ཀྱི་དོན་ཞིག་ཡིན་ལ། ལུང་བསྟན་ཞིག་ཡིན་པའི་ངོས་ནས་འབྲེལ་ཡོད་ཀུན་གྱི་ཐུགས་ལ་འཛིན་འོས་ཀྱི་དོན་དག་གལ་ཆེན་ཞིག་ཀྱང་ཡིན་ནོ།།
གུས་པ་རང་ལ་མཚོན་ན་སྔོན་ཆད་ཞལ་གདམས་ཟབ་མོ་འདི་ཐོས་མ་ཐག་པ་ནས་ཕན་ཐོགས་ཆེན་པོ་བྱུང་ཞིང་། དེ་བཞིན་འདི་ནི་གང་ཟག་སུས་ཐོས་ནའང་དེ་ལ་ཕན་ཐོགས་རྒྱ་ཆེན་པོ་འབྱུང་བའི་ཡིད་ཆེས་ཀྱིས་ཀུན་ནས་བསླངས་ཏེ་རང་བློས་དཔོག་ཚོད་ལྟར་བཀྲལ་ནས་ཕུལ་བ་ཡིན་པས། ཀུན་གྱིས་ཐུགས་ལ་འཛིན་རོགས། དགོངས་གཞིག་གནང་རོགས། ཉམས་སུ་ལེན་རོགས།
དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ཟླ་༡༡ཚེས་༡༡ལ་ཕུལ།
རྒྱ་ཡིག 此為口訣 也是預言
དབྱིན་ཇིའི་ཡིག This is Pithy Instruction as well as Prophecy
བརྒྱུད་བསྐུར། Facebook
