༄༅། །འཇམ་མགོན་མི་ཕམ་ཕྱོགས་ལས་རྣམ་རྒྱལ་ལ་བསྟོད་པ་ཚངས་སྲས་སྒེག་མོའི་གླུ་དབྱངས་བཞུགས་སོ།།
དྷཱིཿ རྒྱལ་ཀུན་མཁྱེན་བརྩེ་ནུས་པའི་རང་གཟུགས་མཆོག །
སྔ་འགྱུར་བཀའ་གཏེར་བསྟན་པའི་སྲོག་འཛིན་མཁས། །
འཆད་རྩོད་རྩོམ་པས་ལྟ་ངན་འཇོམས་མཛད་པ། །
སྨྲ་བའི་སེང་གེ་མི་ཕམ་ལ་ཕྱད་འཚལ། །
ཚོགས་གཉིས་ཡེ་ཤེས་རྒྱ་མཚོ’འོ་རླབས་ཆེན་པོ། །
ཡོངས་བསྲུབས་ལས་འཁྲུངས་འོད་དཀར་མཚན་དཔེའི་སྐུ། །
འགྲོ་ཀུན་མགྲིན་སྔོན་གཙུག་གི་རྒྱན་གྱུར་པ། །
མི་ཕམ་ཆོས་རྗེ་གངས་ལྗོངས་དཔལ་དུ་ཤར། །
གང་གི་སྐུ་གསུང་ཐུགས་ཀྱི་རྣམ་པར་ཐར། །
ལྷ་ལམ་ཇི་བཞིན་ཟད་མཐའ་མི་མངོན་ཡང་། །
བདག་བློ་ལྷག་བསམ་དཀར་བ་མེ་ཏོག་ཆུན། །
དད་ལྡན་མཛའ་ནའི་མགྲིན་པར་མཛེས་ཕྱིར་སྤེལ། །
རྒྱལ་བ་ཀུན་གྱི་གསང་གསུམ་མཁྱེན་པའི་དཔལ། །
གཅིག་འདུས་མཁྱེན་བརྩེ་ནུས་པའི་དབང་པོ་རུ། །
སྐུར་བཞེངས་དམར་སེར་ཐིག་ལེའི་རོལ་གར་ནི། །
འཇམ་དཔལ་ཟུར་ཕུད་ལྔ་པ་ཉིད་དུ་ངེས། །
གང་དེ་ཆུ་ཟླའི་སྣོད་དུ་ཟླ་གཟུགས་བཞིན། །
ཉིད་ལས་ཐ་དད་མེད་པ་སྤྲུལ་པའི་གར། །
གངས་ལྗོངས་འཛིན་མིའི་ཁྱོན་འདིར་འཕོས་པ་ན། །
ནོར་འཛིན་སྒེག་མོས་མ་ཐེག་ཡང་ཡང་གཡོས། །
ཐུན་མོང་ཞིང་གི་གདུལ་བྱའི་སྣང་ངོ་ལྟར། །
སྐྱེ་སོགས་བྲལ་ཡང་སྐྱེ་བ་ལྟར་བསྟན་ནས། །
ཡབ་ཡུམ་ཚོ་འབྲང་སྐལ་ལྡན་དང་འཚམས་པར། །
ངོ་མཚར་སྤྲུལ་པའི་ཁྱེའུའི་ཟློས་གར་བསྒྱུར། །
འགྲོ་ཀུན་ཐེ་ཚོམ་སྨག་རུམ་བསལ་བྱའི་ཕྱིར། །
བསམ་བརྗོད་ཡུལ་ལས་འདུས་པའི་ངོ་མཚར་རྟགས། །
འདྲེན་བྱེད་ཟུང་གི་དགའ་སྟོན་ཐུན་མོང་དུ། །
སྟོན་པའི་ངོ་མཚར་ད་དུང་སྲིད་འདིར་གླེང་། །
ཀུན་མཁྱེན་རྒྱུ་འབྲས་བདེན་པ་གསལ་སླད་དུ། །
ཀློག་དང་འབྲི་སོགས་བསྟེན་འོས་གང་དང་གང་། །
བརྡ་ཙམ་མཐོང་བས་ཇི་བཞིན་ཁོང་ཆུད་ཕྱིར། །
གཞན་ལས་འཕགས་ཞེས་བསྟོད་པའི་གླུ་དབྱངས་འཁྲུལ། །
ཡོན་ཏན་ཀུན་གྱི་གཞི་རྟེན་ཚུལ་ཁྲིམས་སུ། །
གཟིགས་ཏེ་བརྟེན་མཁས་ཡོན་ཏན་རྫོགས་མཛད་པའི། །
ཤིང་རྟའི་སྲོལ་འབྱེད་མཁན་ཆེན་ཞི་བ་འཚོའི། །
རྣམ་ཐར་ཅོད་པཎ་འཆང་བ་ཁྱོད་ཉིད་ཙམ། །
འཇམ་དཔལ་སྨྲ་སེང་སྒྲུབ་པས་དེ་ཉིད་དུ། །
རྟགས་དང་ངོ་མཚར་ཁྱད་པར་ཅན་བརྙེས་ཏེ། །
མདོ་སྔགས་རིག་གནས་བཅས་པའི་གཞུང་གང་ལ། །
བཤད་ལུས་ཙམ་གྱིས་མཁས་པའི་ཕུལ་དུ་ཕྱིན། །
ཚེ་རབས་རིགས་ཀྱི་བདག་པོ་མདོ་སྔགས་གླིང་། །
འཇམ་དབྱངས་མཁྱེན་བརྩེ་དབང་པོའི་ཞབས་པད་མོར། །
མཉེས་པ་གསུམ་གྱི་བརྩོན་པས་ལེགས་མཉེས་ཤིང་། །
གང་གི་ཐུགས་སྲས་ཆོས་ཀྱི་བདག་པོར་གྱུར། །
ངག་དབང་ཟུར་ཕུད་དབྱངས་ཅན་དགའ་མས་བསླུས། །
དེ་སླད་ལྗོངས་འདིར་བསྟན་པ་སྤེལ་ཕྱིར་དུ། །
ཉིད་ལས་ལྷག་ཆས་གསུང་གིས་དབུགས་དབྱུང་དང་། །
ལྷན་དུ་ཆོས་ཀྱི་ལྡེའུ་མིག་ཁྱོད་ལ་བྲིན། །
མཚོ་བྱུང་མགྲིན་པར་ཞུགས་པའི་མཐུ་བརྙེས་ནས། །
སྙན་འགྱུར་གང་དེའི་ལེགས་བཤད་ཚིག་རེས་ཀྱང་། །
སྒྲ་འཛིན་རབ་དགའི་དཔལ་ལ་སྦྱོར་བ་དང་། །
སློབ་དཔོན་དཔའ་བོར་སྐྱེངས་པའི་རྟུལ་ཞུགས་སྦྱིན། །
ཡིད་འཕྲོག་ཚིགས་སུ་བཅད་པའི་སྙན་འགྱུར་འབུམ། །
སྡེབ་སྦྱོར་རྒྱུད་མང་འཁྲུལ་བའི་སོར་མོའི་རྩེར། །
དཔྱད་གསུམ་དྲི་ཟའི་གླུ་དབྱངས་ལེན་པ་ན། །
གངས་ཅན་མཁས་དགུའི་དྲེགས་པ་ཕལ་ཆེར་ཞིག། །
ཚུལ་གསུམ་རྟགས་ཀྱི་ཞོ་འཐུང་རྡོ་རྗེའི་མཐུས། །
ཕས་རྒོལ་ལོག་སྨྲའི་ལྟ་མིན་གཞོན་པ་དང་། །
ལྷན་ཅིག་འཆི་མེད་ཐུབ་བསྟན་ཕོ་བྲང་དེར། །
ཕྱོགས་ལས་རྣམ་རྒྱལ་གྲགས་པའི་རྒྱལ་རྔ་ལྡིར། །
ཟབ་དང་རྒྱ་ཚེའི་གཏིང་དཔག་དགའ་བའི་གནད། །
ས་ལ་གནས་པའི་བྱང་ཆུབ་སེམས་དཔའ་རྣམས། །
ལྗགས་ཀྱང་རྡུགས་ནས་འཆད་ལ་ངལ་གྱུར་ཚེ། །
གང་ཁྱོད་ཞིང་འདིར་རྒྱལ་བགཉིས་པར་བཞེངས། །
ལྷག་པའི་ལྷ་མང་སྒྲུབ་ལ་པ་བཞོལ་བའི་ཚེ། །
འཇམ་དཔལ་གཞོན་ནུ་དགྱེས་པའི་ཆུ་འཛིན་ལས། །
ཤིས་པའི་སྦྲང་ཆར་སིམ་དུ་བསྙིལ་བ་དང། །
སྨྲ་བའི་སེང་གེ་ཁྱོད་ཉིད་གཅིག་ཅེས་བྱིན། །
ལྗོངས་འདིར་བསྟན་འཛིན་ཕལ་ཆེར་ཞི་བར་གཟིམས། །
དེ་ཕྱིར་ཐུབ་བསྟན་ཡལ་དུ་ཉེ་བ་ན། །
མགོན་དེའི་ཐུགས་བསྐྱེད་སྐྱ་རེངས་ཀྱིས་དྲངས་པའི་། །
བྱ་བ་ལས་ཀྱི་ཉིན་བྱེད་ཕྱོགས་བརྒྱར་འབར། །
ཐུན་མོངས་ཐུན་མིན་གཞུང་ལུགས་མཛོད་ཀྱི་རྒྱ། །
ཁྱོད་ཐུགས་སྤོབས་པའི་གཏེར་གྱིས་སྒྲོལ་བའི་ཚེ། །
འཕགས་ཡུལ་སངས་རྒྱས་གཉིས་པ་གྲགས་དེ་ཡང། །
རྫུན་ཞེས་འཇམ་གླིང་མཁས་རྣམས་བཞད་མོས་བྲེལ། །
ཚུལ་ཁྲིམས་འདུལ་བའི་གནང་བཀགས་ཕྲ་མོ་ཡང་། །
སྲོག་དང་མིག་བཞིན་སྲུང་སྡོམ་ལ་བརྩོན་པས། །
འཕགས་ཡུལ་འདུལ་འཛིན་ཉེ་བར་འཁོར་མཆོག་དང་། །
ཐ་དད་འབྱེད་པའི་ཀུན་རྟོགས་རིང་དུ་བྲོས། །
མར་གྱུར་ལུས་ཅན་འགྲོ་ཀུན་གཏན་བདེ་རུ། །
དམིགས་ནས་རྫོགས་བྱང་དོན་གཉེར་བྱང་ཆུབ་སེམས། །
སྐྱེད་བཞིན་གཞན་དོན་ཁོ་ནར་གཉེར་བ་ལས། །
རང་དོན་ཆགས་སེམས་སྐད་ཅིག་ཙམ་ཡང་དབེན། །
ཁྱོད་ཐུགས་སྐྱེས་སྟོབས་ཤེས་རབ་བཞིན་བཟང་པོར། །
སྦྱོར་བྱུང་ཐོས་བསམ་སྒོམ་པའི་རྒྱན་སྤྲོས་ཚེ། །
འཆད་རྩོད་ལུས་ཕྲའི་ཟུར་མིག་དབང་མེད་དུ། །
གཡོས་ཚེ་མཁས་དབང་ཕལ་ཞིག་རེ་སྟོང་གྱུར། །
གསལ་བརྟན་ཚད་དུ་རྫོགས་པའི་བསྐྱེད་རིམ་གྱིས། །
སྣང་གྲགས་རིགས་པ་ལྷ་སྔགས་ཆོས་ཉིད་དུ། །
རྟོགས་ནས་ཆོས་ཉིད་འོད་གསལ་ངང་ཐིམ་པས། །
སྐུ་ཡི་གཟུགས་ལ་གྲིབ་མའི་སྒྲིབ་པ་དབེན། །
ཆོས་ཉིད་བརྗོད་འདས་སྒྲིབ་བྲལ་གདོད་མའི་མཁར། །
ཆོས་ཟད་བློ་འདས་རིག་དང་འཇའ་ཚོན་བཀྲ། །
གཟིགས་སྟང་གསུམ་གྱི་བསྣུན་པས་གདོད་མའི་ཞལ། །
རང་རིག་མཇལ་ལ་ཕྱི་ནང་ཟ་འོག་ཙམ། །
སྡེ་གསུམ་ཀློང་དགུའི་ཤིང་རྟ་ཁྱོད་ཉིད་ཅེས། །
སྟོན་འདོད་མེད་ཀྱང་རྣམ་དཔྱོད་ཨཱ་དར་ཤ། །
གནས་ལུགས་གཟུགས་བརྙན་འབུམ་དུ་འཆར་བ་ན། །
རྟེན་འབྲེལ་རྒྱ་འབྲས་བདེན་པ་སུ་ཡིས་འགོག །
མགོན་པོ་གང་གི་བཀའ་དྲིན་ལ་བརྟེན་ནས། །
ཀཿདཔལ་ཞེ་རྫོགས་སྨིན་རྡོར་གཙོས་བྱས་པའི། །
རིས་མེད་ཕྱོགས་བརྒྱར་མཁས་གྲུབ་སློབ་བུའི་ཚོགས། །
ས་སྟེང་གང་བར་མཛད་པའི་ངོ་མཚར་རྨད། །
དེ་མཐུས་འཛམ་གླིང་ཡངས་པའི་ཁྱོན་འདི་ན། །
སྔ་འགྱུར་བཤད་སྒྲུབ་བསྟན་པ་མུ་མེད་དུ། །
འཆད་ཉན་སྒོམ་སྒྲུབ་བགྱིས་པའི་སྐལ་བཟང་འདིར། །
ཁྱོད་ཉིད་མཐུ་ལས་གཞན་གྱིས་ཅང་མ་ཡིན། །
མང་མང་མཁས་པའི་དབུས་སུ་སེང་གེའི་སྒྲ། །
ཡང་ཡང་སྒྲོགས་པའི་སྤོབས་པའི་ཀློང་ཆེན་པོ། །
མཁས་མཁས་མང་ཡང་སྲིད་འདིར་ཁྱོད་ཙམ་ལས། །
དུང་དུང་མེད་པའི་ངེས་པ་ཁོང་ནས་བརྙེས། །
རེ་ཞིག་རྟག་འཛིན་བློ་ངོར་བསྐུལ་བ་དང་། །
ལྗོངས་འདིའི་བསོད་ནམས་ཕུང་པོ་དམན་སྟབས་ཀྱིས། །
རྡོ་རྗེའི་སྐུ་ལ་སྐྱེ་འཆི་མི་མངའ་ཡང་། །
ཆོས་ཀྱི་དབྱིངས་ལ་དགྱེས་པའི་དགོངས་པ་གཏད། །
དེ་ཚེ་འཇིག་རྟེན་དྲུག་ཏུ་གཡོས་པ་དང་། །
འོད་་ཟེར་སྒྲ་འབྱོན་འུར་དང་རབ་ཏུ་འོར། །
དེ་སོགས་སྟོན་པ་མངོན་སངས་རྒྱས་ཇི་བཞིན། །
བསིལ་ལྗོངས་ཆོས་ཚིགས་ཡུལ་གྱི་ངོ་མཚར་ངོམ། །
སྣང་བཞི་ཟད་སར་ཕྱིན་པའི་མངོན་རྟགས་སུ། །
གདུང་ལྔ་རིང་བསྲེལ་ངོ་མཚར་འཇའ་སྤྲིན་སོགས། །
དད་ལྡན་ཡོངས་ཀྱིས་བསོད་ནམས་གསོག་རྟེན་དུ། །
རིན་ཆེན་དབང་རྒྱལ་ད་དུང་སྲིད་འདིར་བཞུགས། །
དེ་སོགས་གང་གི་རྣམ་པར་ཐར་པ་ལ། །
བསྟོད་སྨད་ཚིག་གི་སྤྲོས་པ་དབེན་ན་ཡང་། །
བདག་བློ་དད་པའི་བདུད་རྩིས་རབ་མྱོས་ནས། །
གང་དྲན་ཚིག་གསུམ་ཤོར་བ་མཐོལ་ལོ་བཤགས། །
བདག་ཀྱང་མགོན་པོ་གང་དེའི་ཐུགས་རྗེའི་འོག །
དཔྱང་ཐག་ནམ་ཡང་ལྷོད་པ་མེད་པའི་ངང་། །
ཁམས་གསུམ་འཁོར་བ་དོང་ནས་སྤྲུགས་ནུས་པའི། །
བདག་གི་སྨོན་ལམ་མཁའ་དབྱིངས་སྒེག་མོས་འཆིང་། །
བདག་འདྲ་ཡོན་ཏན་ན་ཚོད་ཕྲ་ན་ཡང་། །
འཇམ་མགོན་བླ་མ་དགྱེས་པའི་ཞལ་གྱི་ཆབ། །
སྙིང་གའི་དབུས་སུ་ཟིམ་པའི་སྙེམས་པ་འདི། །
མ་བཟོད་དབང་མེད་གང་དྲན་རེ་ཁར་མཛེས། །
ཞེས་པ་འདིའང་མཁན་པོ་རིག་འཛིན་དང་སློབ་དཔོན་པདྨ་རྒྱལ་མཚན་མཆོག་ནས་ལྷ་རེག་དར་ཨ་ཤེ་བཅས་བསྐུལ་ངོར་བོད་རྒྱལ་ལོ་༢༡༡༧ས་ཟླའི་དམྲ་ཕྱོགས་སྟོང་པ་གསུམ་པ། སྤྱི་ལོ་ ༡༩༩༠ ལོར་དཔལ་ཡུལ་མཆོག་སྤྲུལ་མིང་འཛིན་པས་གློ་བུར་དུ་ཚོགས་གྲལ་དུ་བྲིས་པ་དགེའོ།། །།
