ཐམས་ཅད་ལ་ཕྱག་འཚལ་ལོ།

༄། །ཐམས་ཅད་ལ་ཕྱག་འཚལ་ལོ།།

དགེ་སློང་ངུར་སྨྲིག་འཛིན་ལ་ཕྱག་འཚལ་ལོ། ། གཞན་གནོད་གཞི་བཅས་སྤོང་ལ་ཕྱག་འཚལ་ལོ། ། ཡོན་ཏན་བཅུ་གཉིས་ལྡན་ལ་ཕྱག་འཚལ་ལོ། ། གཞི་གསུམ་ལག་ལེན་མཛད་ལ་ཕྱག་འཚལ་ལོ། ། བསྟན་རྩ་དགེ་སློང་ཀུན་ལ་ཕྱག་འཚལ་ལོ། ། ཁྱིམ་པ་བྱང་སེམས་རྣམས་ལ་ཕྱག་འཚལ་ལོ། །

མཆོག་གསུམ་བླ་མར་བྱེད་ལ་ཕྱག་འཚལ་ལོ། ། གཞན་ཕན་རྒྱ་ཆེར་མཛད་ལ་ཕྱག་འཚལ་ལོ། ། ཕ་རོལ་ཕྱིན་དྲུག་སྒྲུབ་ལ་ཕྱག་འཚལ་ལོ། ། བསྡུ་བ་རྣམ་བཞི་མཛད་ལ་ཕྱག་འཚལ་ལོ། ། སྔགས་འཆང་རྡོ་རྗེ་འཛིན་ལ་ཕྱག་འཚལ་ལོ། ། བསྐྱེད་རྫོགས་ཟུང་དུ་འཇུག་ལ་ཕྱག་འཚལ་ལོ། ། བསྙེན་སྒྲུབ་རྣམ་བཞི་སྒྲུབ་ལ་ཕྱག་འཚལ་ལོ། ། སྦྱོར་སྒྲོལ་བརྟུལ་ཞུགས་ཅན་ལ་ཕྱག་འཚལ་ལོ། །

རྫོགས་པའི་སངས་རྒྱས་རྣམས་ལ་ཕྱག་འཚལ་ལོ། ། བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། ། ཉན་ཐོས་རང་རྒྱལ་རྣམས་ལ་ཕྱག་འཚལ་ལོ། །

རི་བོ་དགེ་ལྡན་པ་ལ་ཕྱག་འཚལ་ལོ། ། དཔལ་ལྡན་ས་སྐྱ་པ་ལ་ཕྱག་འཚལ་ལོ། ། འགྲོ་མགོན་བཀའ་བརྒྱུད་པ་ལ་ཕྱག་འཚལ་ལོ། ། ཇོ་ནང་བརྒྱུད་པར་བཅས་ལ་ཕྱག་འཚལ་ལོ། ། སྔ་འགྱུར་རྙིང་མ་པ་ལ་ཕྱག་འཚལ་ལོ། ། གཡུང་དྲུང་བོན་པོ་རྣམས་ལ་ཕྱག་འཚལ་ལོ། ། ཕྱི་ནང་གྲུབ་མཐའ་ཀུན་ལ་ཕྱག་འཚལ་ལོ། །

ཕ་མ་སེམས་ཅན་ཡོངས་ལ་ཕྱག་འཚལ་ལོ། ། དྲིན་ཆེན་དྲིན་ལན་འཇལ་བར་བྱིན་གྱིས་རློབས། །

སྡང་བའི་དགྲ་བོ་ཀུན་ལ་ཕྱག་འཚལ་ལོ། ། ཚེ་འདིར་བར་ཆད་ཞི་བར་བྱིན་གྱིས་རློབས། །

གནོད་བྱེད་བགེགས་རིགས་ཀུན་ལ་ཕྱག་འཚལ་ལོ། ། ཕྱི་མའི་ལམ་སྣ་འདྲེན་པར་བྱིན་གྱིས་རློབས། །

བྱམས་པའི་གཉེན་ཉེ་ཀུན་ལ་ཕྱག་འཚལ་ལོ། ། ཐར་བའི་ལམ་སྣ་ཟིན་པར་བྱིན་གྱིས་རློབས། །

མཐོང་ཐོས་དྲན་རེག་ཀུན་ལ་ཕྱག་འཚལ་ལོ། ། འཁོར་བ་དོང་ནས་སྤྲུགས་པར་བྱིན་གྱིས་རློབས། །

བླ་མ་བཀའ་དྲིན་ཅན་ལ་ཕྱག་འཚལ་ལོ། ། རང་རྒྱུད་ཆོས་དང་འདྲེས་པར་བྱིན་གྱིས་རློབས། །

དཔལ་ལྡན་བླ་མའི་ཡུམ་ལ་ཕྱག་འཚལ་ལོ། ། སྟོང་ཉིད་ཤེས་རབ་རྟོགས་པར་བྱིན་གྱིས་རློབས། །

རྡོ་རྗེའི་མཆེད་ལྕམ་རྣམས་ལ་ཕྱག་འཚལ་ལོ། ། དག་སྣང་ཕྱོགས་མེད་འབྱོང་བར་བྱིན་གྱིས་རློབས། །

འཁོར་གཡོག་སྒོ་ཟོག་ཀུན་ལ་ཕྱག་འཚལ་ལོ། ། བདེ་བ་ཅན་དུ་སྐྱེ་བར་བྱིན་གྱིས་རློབས། །

ན་ན་ཀུན་གྱི་ན་གོ་ཆོད་པར་ཤོག ། ཤི་ན་ཀུན་གྱི་ཤི་གོ་ཆོད་པར་ཤོག ། ངན་པ་ཐམས་ཅད་བདག་ལ་སྨིན་པར་ཤོག ། བཟང་པོ་ཐམས་ཅད་ཀུན་ལ་འཐོབ་པར་ཤོག །

རང་གཞན་ཀུན་གྱིས་དེ་ལྟར་བསམ་ཐུབ་ན་ཆོས་པ་རྣམ་པར་དག་པའི་ཚད་དམའ་མོ་ཞིག་ཏུ་འགྲོ་ཐུབ་བམ་སྙམ།   མཆོག་སྤྲུལ་བདག་གི་ཁ་ཞེ་གཉིས་མེད་ཀྱི་བསམ་ཚུལ་ཡིན།   དེ་བཞིན་འགྲུབ་པར་ཤོག   སྤྱི་༢༠༢༠ཟླ་༨ཚེས་༢༠ཉིན་བཟང་པོར་ཕུལ།

རྒྱ་ཡིག    頂禮遍一切處 དབྱིན་ཇིའི་ཡིག    Bow to All of the Dharmadhatu Facebook link བློ་སྦྱོང་ཚིག་བརྒྱད་མའི་རིམ་པ།

• ཚིག་་སྐབས་༡།   སེམས་ཅན་ལ་མ་བསྟེན་པར་སངས་རྒྱས་འཐོབ་མི་ཐུབ།
• ཚིག་་སྐབས་༢།   འདྲེ་ཡིས་ཁྱོད་མི་བཟང་པོ་ཡིན་པ་ཤེས་འདུག
• ཚིག་་སྐབས་༣།   གནས་ཚུལ་ཡག་པོ་ཞིག་འདུག
• ཚིག་་སྐབས་༤།   ཁྱེད་ལ་གོ་སྐབས་བཟང་པོ་ཞིག་ཐོབ་སོང་།
• ཚིག་་སྐབས་༥།   ཀུན་གྱི་དགའ་རྟགས་ཁྱེད་ལ་ཐོབ་འོང་།
• ཚིག་་སྐབས་༦།   བུ་ལོན་ཚང་མ་སྤྲོད་ཐུབ་སོང་།
• ཚིག་་སྐབས་༧།   སྦས་ནས་བསྒྲུབས་ན་བྱ་བ་ཆེན་པོ་འགྲུབ་འོང་།
• ཚིག་་སྐབས་༨།   ཅི་ཙམ་གསང་ཐུབ་ན་དེ་ཙམ་ལེགས་འདུག