༼ ༡ ༽
༧སྐྱབས་རྗེ་འཇིགས་བྲལ་ཡེ་ཤེས་རྡོ་རྗེ་རིན་པོ་ཆེ།
༄། །ཆུང་ངུའི་དུས་ནས་ཨོ་རྒྱན་དངོས་སུ་མཇལ།།
བཀའ་གཏེར་གཉིས་ཀྱི་བསྟན་པ་ཕྱོགས་བཅུར་སྤེལ།།
སྐལ་ལྡན་རྗེས་བཟུང་འབྲེལ་ཚད་དཔལ་རིར་ཁྲིད།།
ཡེ་ཤེས་རྡོ་རྗེའི་རྣམ་ཐར་བསམ་ལས་འདས།།
༼ ༢ ༽
༧སྐྱབས་རྗེ་རབ་གསལ་ཟླ་བ་རིན་པོ་ཆེ།
༄། །མདོ་ཁམས་ཡུལ་དུ་སྐུ་ཡི་སྐྱེ་བ་བཟུང་།།
རྒྱ་བལ་འབྲུག་དང་ཤར་ནུབ་རྒྱལ་ཁམས་སུ།།
དབང་ལུང་ཁྲིད་དང་ཟབ་ཆོས་ཅི་དགར་འགྱེད།།
རབ་གསལ་ཟླ་བའི་བཀའ་དྲིན་བརྗོད་མཐའ་བྲལ།།
༼ ༣ ༽
༧སྐྱབས་རྗེ་གྲུབ་དབང་པདྨ་ནོར་བུ་རིན་པོ་ཆེ།
༄། །རང་དོན་སྤངས་ནས་སྐུ་ཚེ་ཧྲིལ་བོ་རུ།།
བསྟན་དང་འགྲོ་བའི་དོན་ཆེན་ཁོ་ན་མཛད།།
མ་འདྲིས་ཀུན་གྱི་མཛའ་བཤེས་མཆོག་གྱུར་པ།།
གྲུབ་དབང་བླ་མ་རིགས་ཀྱི་བདག་པོར་ཐོབ།།
༼ ༤ ༽
༧སྐྱབས་རྗེ་བྱ་བྲལ་སངས་རྒྱས་རྡོ་རྗེ་རིན་པོ་ཆེ།
༄། །ཉམ་ཆུང་སེམས་ཅན་སྲོག་གི་འཇིགས་ལས་བསྐྱབས།།
དུས་འདིར་དཀར་ཟས་སྲོལ་གཏོད་གཞན་དོན་མཛད།།
ཀུན་སྤང་ཡོངས་ཀྱི་རྒྱལ་པོ་རྫོགས་ཆེན་པ།།
སངས་རྒྱས་རྡོ་རྗེ་སངས་རྒྱས་ཀུན་དང་མཉམ།།
༼ ༥ ༽
༧སྐྱབས་རྗེ་རྡོ་གྲུབ་ཆེན་རིན་པོ་ཆེ།
༄། །སྙིང་ཐིག་བསྟན་པའི་བདག་པོ་རྡོ་གྲུབ་པ།།
གསེར་རྟར་སྐུ་འཁྲུངས་གཡུ་ཁོག་བླ་མ་བསྟེན།།
དབང་ལུང་རྒྱུན་སྤེལ་འགྲོ་དོན་བསམ་མི་ཁྱབ།།
བླ་མ་དམ་པའི་སྐུ་ཚེ་བརྟན་པར་ཤོག།
༼ ༦ ༽
མཁན་ཆེན་འཇམ་དབྱངས་རྡོ་རྗེ།
༄། །བློ་གྲོས་བཤད་སྒྲུབ་ཉི་མ་རིགས་བདག་བཟུང་།།
རྫོགས་པ་ཆེན་པོའི་དགོངས་པ་མངོན་དུ་གྱུར།།
འབྲེལ་ཚད་ཐར་བའི་ལམ་ལ་བཀོད་མཛད་པ།།
མཁན་ཆེན་འཇམ་དབྱངས་རྡོ་རྗེར་གསོལ་བ་འདེབས།།
༼ ༧ ༽
༧སྐྱབས་རྗེ་མཁན་ཆེན་འཇིགས་མེད་ཕུན་ཚོགས་རིན་པོ་ཆེ།
༄། །རྟོགས་པས་བདག་གྲོལ་ཐུགས་རྗེས་གཞན་རྒྱུད་འགྲོལ།།
ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན།།
འབྲེལ་ཚད་བདེ་ཆེན་ཞིང་དུ་ཁྲིད་མཛད་པ།།
འཇིགས་མེད་ཕུན་ཚོགས་འདྲ་བའི་བླ་མ་དཀོན།།
༼ ༨ ༽
༧སྐྱབས་རྗེ་ལྷ་སྤྲུལ་གར་དབང་ཉི་མ་རིན་པོ་ཆེ།
༄། །ཉེས་བྱས་ཕྲ་མོ་ཙམ་གྱིས་མ་གོས་ཞིང་།།
གཞི་གསུམ་བསྟན་པའི་རྒྱལ་མཚན་ཞིང་འདིར་བསྒྲེངས།།
ངུར་སྨྲིག་འཛིན་པ་ཀུན་གྱི་མཆོག་གྱུར་པ།།
ལྷ་སྤྲུལ་གར་ཉི་སྐུ་ཚེ་བརྟན་པར་ཤོག།
༼ ༩ ༽
༧སྐྱབས་རྗེ་བསྟན་པའི་དབང་ཕྱུག་རིན་པོ་ཆེ།
༄། །ཀ་དག་རིག་སྟོང་དགོངས་པ་མངོན་དུ་གྱུར།།
ལྷུན་གྲུབ་སྣང་བཞིའི་ཡེ་ཤེས་མཐའ་རུ་ཕྱིན།།
དོན་དམ་རང་ངོ་སྤྲོད་པའི་བླ་མ་མཆོག།
བསྟན་པའི་དབང་ཕྱུག་སྤྱི་བོའི་རྒྱན་དུ་བཞུགས།།
༼ ༡༠ ༽
༧སྐྱབས་རྗེ་ཨ་ཁྱུག་རིན་པོ་ཆེ།
༄། །སྣང་བ་ཐམས་ཅད་སྐུ་དང་ཞིང་དུ་གཟིགས།།
གདུལ་བྱ་རྗེས་བཟུང་སྣང་བཞི་མཐའ་རུ་ཕྱིན།།
གྲུབ་པས་ས་ཁེངས་དགེ་འདུན་ཕྱོགས་བཞིར་ཁྱབ།།
ཨ་ཁྱུག་བླ་མའི་འཕྲིན་ལས་དོ་ཟླ་མེད།།
༼ ༡༡ ༽
༧སྐྱབས་རྗེ་མཁན་ཆེན་པདྨ་བློ་གྲོས་རིན་པོ་ཆེ།
༄། །ངེས་པའི་དོན་དུ་དྲི་མེད་བཤེས་གཉེན་ཏེ།།
གདུལ་བྱའི་སྣང་ངོར་མི་ཡི་ཤ་ཚུགས་ཅན།།
རྫོགས་ཆེན་སྙན་བརྒྱུད་མན་ངག་འཆང་པ་པོ།།
མཁན་ཆེན་པད་བློ་སྐུ་ཚེ་བརྟན་པར་ཤོག།
༼ ༡༢ ༽
༧སྐྱབས་རྗེ་པདྨ་སྐལ་བཟང་རིན་པོ་ཆེ།
༄། །འཆད་ལ་ཟླ་མེད་རྡོ་རྗེའི་ལྗགས་ལ་དབང་།།
རྩོད་ལ་འགྲན་མེད་མི་འཇིགས་ང་རོ་སྒྲོག།
རྩོམ་ལ་དོ་མེད་སྣང་སྲིད་དཔེ་ཆར་ཤར།།
པདྨ་སྐལ་བཟང་སྐུ་ཚེ་བརྟན་པར་ཤོག།
༼ ༡༣ ༽
༧སྐྱབས་རྗེ་འཕྲིན་ལས་ནོར་བུ་རིན་པོ་ཆེ།
༄། །ཀློང་ཆེན་རབ་འབྱམས་མི་ཡི་གཟུགས་སུ་སྣང་།།
བརྟུལ་ཞུགས་སྤྱོད་པས་མ་ཚོགས་དབང་དུ་བསྡུས།།
བདུད་འཇོམས་ཟབ་གཏེར་འཛམ་གླིང་ཀུན་ཏུ་སྤེལ།།
འཕྲིན་ལས་ནོར་བུས་རྟག་ཏུ་ཐུགས་རྗེས་གཟིགས།།
༼ ༡༤ ༽
༧སྐྱབས་རྗེ་མཁན་པོ་མུན་སེལ།
༄། །ངག་གི་དབང་པོའི་དོན་རྒྱུད་དགོངས་པ་ཐོབ།།
རྫོགས་པ་ཆེན་པོའི་ཡེ་ཤེས་མངོན་དུ་གྱུར།།
མདོ་སྨད་ལྗོངས་སུ་སྙིང་ཐིག་བསྟན་པ་སྤེལ།།
མཁན་ཆེན་མུན་སེལ་ཞབས་ལ་གསོལ་བ་འདེབས།།
དོན་རྒྱུད་དགོངས་པའི་བྱིན་རླབས་འཕོ་བ་དང་།།
ཚེ་འདིར་བརྟེན་ས་ཟིན་པར་བྱིན་གྱིས་རློབས།།
༼ ༡༥ ༽
དགེ་རྒན་ཚང་མཁན་པོ་བསྟན་འཛིན་བཟང་པོ།
༄། །ནམ་མཁའི་རྣལ་འབྱོར་མི་ཡིས་རྫུ་ལ་རོལ།།
ཐེག་པའི་ཡང་རྩེ་རྫོགས་པ་ཆེན་པོ་ཡིས།།
བསྟན་པ་སྤེལ་ཞིང་བསྐལ་ལྡན་རྗེས་སུ་བཟུང་།།
མཁན་པོ་བསྟན་འཛིན་བཟང་པོར་གསོལ་བ་འདེབས།།
མགོན་པོ་གང་གི་དངོས་སློབ་མཆོག་སྤྲུལ་ཆོས་ཀྱི་ཉི་མ་ནས་དྲྭ་ལམ་དུ་བསྐུལ་མ་བྱུང་ཞིང་ཐུགས་བཞེད་བསྐང་ཕྱིར་དུ་དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ ཟླ་༡༠ ཚེས་༡ ལ་ཕུལ།།
༼ ༡༦ ༽
༧སྐྱབས་རྗེ་དཔལ་ཡུལ་ཐུབ་བསྟན་དཔལ་བཟང་རིན་པོ་ཆེ།
༄། །བཀའ་མའི་བསྟན་ལ་བཀའ་དྲིན་ལྷག་ཏུ་ཆེ།།
དཔལ་ཡུལ་བསྟན་པའི་བཤད་སྒྲུབ་ལས་གསུམ་སྤེལ།།
ངག་དགའི་སྙན་བརྒྱུད་ལྷག་མ་མེད་པར་ཐོབ།།
ཐུབ་བཟང་མཆོག་གི་སྐུ་ཚེ་བརྟན་པར་ཤོག།
༼ ༡༧ ༽
༧སྐྱབས་རྗེ་མདོ་མང་གཡང་ཐང་རིན་པོ་ཆེ།
༄། །རྡོ་རྗེ་གཞོན་ནུ་ཡུལ་གསུམ་གྱད་དུ་གྱུར།།
སློབ་དཔོན་པདྨའི་ཟབ་མོ་གཏེར་ལ་དབང་།།
འབྲས་མོ་ལྗོངས་སུ་སྐལ་ལྡན་རྗེས་སུ་བཟུང་།།
མདོ་མང་གཡང་ཐང་ཞབས་ལ་གསོལ་བ་འདེབས།།
༼ ༡༨ ༽
མཁས་གྲུབ་གཉིས་ལྡན་ཨ་ལག་གཟན་དཀར་རིན་པོ་ཆེ།
༄། །གྲུབ་པའི་ཁྱུ་མཆོག་ཡེ་ཤེས་རྡོ་རྗེ་ཉིད།།
བཞག་བྲའི་ཡུལ་དུ་སྐུ་ཡི་མཚན་དཔེ་བཞད།།
མཛད་པའི་ཕྱག་རྗེས་གངས་ཅན་ཡུལ་དུ་བཞག།
གཟན་དཀར་སྤྲུལ་སྐུའི་སྐུ་ཚེ་བརྟན་པར་ཤོག།
༼ ༡༩ ༽
དཔེ་ཝར་སྤྲུལ་སྐུ་རིན་པོ་ཆེ།
༄། །འཇམ་དཔལ་དབྱངས་དངོས་ཆོས་ཀྱི་བློ་གྲོས་ཀྱིས།།
རྗེས་བཟུང་རང་དོན་རྟོགས་པ་མངོན་དུ་གྱུར།།
མཛོད་ཆེན་རྣམ་ལྔའི་བསྟན་པ་སླར་ཡང་སྤེལ།།
དཔེ་སྤྲུལ་འཆི་མེད་རྡོ་རྗེའི་སྐུ་ཚེ་བརྟན།།
༼ ༢༠ ༽
བཀའ་དྲིན་ཅན་གྱི་དགེ་བའི་བཤེས་གཉེན་རྣམ་པ།
༄། །མཁན་པོ་བརྩོན་འགྲུས་མཁན་པོ་རིན་ཆེན་མཆོག།
པདྨ་ཤེས་རབ་རྣམ་གྲོལ་ཟླ་ཟེར་དང་།།
ཆོས་ཀྱི་གོ་ཆ་དབང་ལོ་ལ་སོགས་ལས།།
མདོ་སྔགས་གཞུང་ལུགས་ཐོས་པའི་སྐལ་བ་ཐོབ།།
༼ ༢༡ ༽
ཡོངས་འཛིན་བཀའ་དྲིན་ཅན་རྣམས།
༄། །ཨ་རྡོ་བླ་མ་བླ་མ་ཞང་ལུ་དང་།།
ཨ་ཁུ་བླ་མ་ཞྭ་སྒམ་སྤྲུལ་སྐུ་དང་།།
ཚེ་རིང་ནོར་བུ་རྭ་སྐོར་ཐུབ་ནོར་སོགས།།
བཀའ་དྲིན་ཆེ་འོས་སྙིང་ནས་བརྗེད་ཐབས་བྲལ།།
༼ ༢༢ ༽
རིས་སུ་མ་ཆད་པའི་དགེ་བའི་བཤེས་གཉེན་དམ་པ་རྣམས་ལ།
༄། །ཚུལ་ཁྲིམས་བཟང་པོ་ནམ་མཁའི་སྙིང་པོ་དང་།།
ཚུལ་ཁྲིམས་བློ་གྲོས་མཁན་པོ་བསོད་དར་རྒྱས།།
གང་དུ་སུ་བཞུགས་ཐམས་ཅད་སྐུ་ཚེ་བརྟན།།
མཛད་པ་འཕྲིན་ལས་མཁའ་དང་མཉམ་པར་སྨོན།།
༼ ༢༣ ༽
གོས་དཀར་ལྕང་ལོ་ཅན་གྱི་སྔགས་པ་རྣམ་པ་ཚོ།
༄། །སྣ་ཚོགས་གཟུགས་ཅན་ཁྲོམ་སྨྱོན་སྐལ་བཟང་དང་།།
ནམ་མཁའ་ཆོས་ཉིད་ནམ་མཁའ་རིན་པོ་ཆེ།།
མི་ཉག་གྲུབ་རྒན་ཕུར་དར་གྲུ་བཞི་སོགས།།
རལ་བ་ཅན་རྣམས་སྐུ་ཚེ་བརྟན་པར་ཤོག།
༼ ༢༤ ༽
རྡོ་རྗེའི་མཆེད་གྲོགས་རྣམ་པ།
༄། །ཀརྨ་སྐུ་ཆེན་གྱང་ཁང་རྨུགས་སངས་དང་།།
རྫོང་མཁྱེན་རབ་འབྱམས་རྫོགས་སྤྲུལ་བདུན་པ་དང་།།
སྨིན་གླིང་མཁན་ཆེན་ཀཿ ཐོག་དབོན་སྤྲུལ་སོགས།།
རྡོ་རྗེའི་མཆེད་རྣམས་སྐུ་ཚེ་རྟག་བརྟན་ཤོག།
ཞེས་དད་གུས་སྤྲོ་གསུམ་གྱི་ངང་སྒོ་གསུམ་གུས་ཕྱག་དང་བཅས་དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ ཟླ་༩ ཚེས་༢༦ ལ་ཕུལ།།
རྒྱ་ཡིག 讚頌諸大德
