༼ འདི་འདྲ་ཞིག་མི་ཞུ་ཀ་མེད་བྱུང་། ༽
༄། །སྤྱིར་བོད་གངས་ཅན་ལྗོངས་ཀྱི་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་མཁས་གྲུབ་རྣམས་ཀྱིས་རང་གི་རྣམ་དཔྱོད་རྩལ་དུ་བཏོན་ནས་བརྩམས་པའི་བསྟན་བཅོས་དང་། མཁས་གྲུབ་མང་པོ་ཞིག་གིས་ཡི་དམ་ལྷག་པའི་ལྷས་རྗེས་སུ་བཟུང་ནས་བརྩམས་པའི་གཞུང་སོགས་ནི་ཚིག་དོན་གང་གི་ཆ་ནས་ཀྱང་ཕུན་སུམ་ཚོགས་པ་ཤ་སྟག་ཡིན། ངེད་རྙིང་མ་ཚང་ལ་མཚོན་ན། དེ་ཀུན་དང་མི་འདྲ་བའི་གཏེར་ཆོས་ཟེར་བ་ཞིག་ཡོད། དེ་ནི་ཚིག་དོན་བྱིན་རླབས་གང་གི་ཆ་ནས་གཞན་གང་དང་ཡང་མི་མཚུངས་པའི་ཁྱད་ཆོས་ཆེན་པོ་དང་ལྡན་པ་ཞིག་ཡིན་ཏེ། དཔེར་ན། མངའ་བདག་ཉང་དང་། གུ་རུ་ཆོས་དབང་དང་། རིག་འཛིན་རྒོད་ལྡེམ་སྟེ། གཏེར་སྟོན་ཉི་ཟླ་ནོར་བུ་རྣམ་གསུམ་དང་། གླིང་པ་བཅུ་གསུམ་དུ་གྲགས་པ་རྣམས་དང་། ཀུན་མཁྱེན་ཆོས་རྗེའི་གཞུང་ལས་བྱིན་བརྒྱུད་འཕོས་པའི་ལྷ་བཙུན་ནམ་མཁའ་འཇིགས་མེད་དང་། རིག་འཛིན་འཇིགས་མེད་གླིང་པ་སོགས་ཀྱི་གཏེར་ཆོས་ནི་བརྗོད་བྱའི་དོན་ཟབ་ཅིང་རྒྱ་ཆེ་བ། རྗོད་བྱེད་ཀྱི་ཚིག་སྙན་ཞིང་འཇེབས་པ། རྟོག་གེ་བ་འབུམ་གཅིག་ཞལ་བསྡུར་ནས་བྲིས་རུང་བྱིན་རླབས་ཀྱི་ཆེ་བ་དང་དོན་གྱི་ཟབ་ཁྱད་ནི་ལྟ་ཅི། ཚིག་གི་སྙན་ཆ་དང་གཞུང་གི་གོ་རིམ། ཐ་ན་རྒྱུན་མཐོང་གི་ཐ་སྙད་སྤྱོད་སྟངས་ཡན་ཆོད་གཞན་སུས་ཀྱང་འོང་ཐབས་རྩ་བ་ནས་མེད་པ་ཞིག་ཡིན་པ་ནི་ཟུར་བལྟས་ལེབ་མཐོང་འདི་ག་ལགས་ཤིང་། དེ་མིན་མི་འགྱུར་རྡོ་རྗེའི་གནམ་ཆོས་ལྟ་བུ་རྗོད་བྱེད་ཀྱི་ཚིག་ནི་ལམ་དང་ལུགས་སྲོལ་གྱི་བཀག་རྒྱ་ལས་ཡོངས་སུ་གྲོལ་བའི་བཅོས་མིན་རང་ཤར་རམ། རང་བྱུང་བཟོ་མེད་ཀྱི་ཉམས་གསོན་པོར་ཡོད་པའི་གཏེར་ཆོས་འདི་དག་ཀྱང་ཕར་ཉན་ཚོད་ལ་སྙན་ཆ་ཚོད་མེད་ཅིག་ཡོད་པ་མི་ཚོར་ཡང་། བརྗོད་བྱའི་ཟབ་ཁྱད་ནི་གོང་མ་དེ་དག་ལས་ཅུང་ཟད་ཙམ་ཡང་མི་དམན་པར་བཞུགས་པ་འདི་དག་ལ་གཟིགས་རྟོག་ཅུང་ཙམ་མྱོང་མཁན་ཞིག་ཡིན་ན། དེང་སང་མི་འགའ་རེས་ཡི་དམ་ལྷག་པའི་ལྷས་བྱིན་གྱིས་བརླབས་པ་ལས་བྱུང་བ་ཡིན་ཟེར་བ་དང་། གཏེར་ཆོས་ཡིན་ཟེར་ནས་ཡི་གེ་ཤོག་སྡེབ་ཁ་ཤས་བཀྲམ་གྱིན་ཡོད་པ་འདི་དག་ལ་བལྟས་པ་ཙམ་གྱིས། ཨ་ཞད་མ་ལ་སྐྱ་ཞད་དང་། གོས་མཐའ་དེ་ན་བཙའ་ཞད་ཅིག་ཟེར་བའི་དཔེ་ལྟར། རྫུན་མའི་ཞད་ཅིག་ཡོད་པ་ནི་མངོན་སུམ་མཐོང་ཆོས་ལགས་ཏེ། བརྗོད་བྱ་ལ་ཟབ་ཁྱད་ཀྱི་བཤད་རིན་ཕར་ཞོག རྗོད་བྱེད་ཀྱི་ཚིག་ཀྱང་མགོ་རྐང་མ་འབྱོར་བ་དང་ཡིག་ནོར་ལུང་བ་གང་ཡིན་པ་འདི་རིགས་མཐོང་ཐེངས་རེ་རེས། ཟོག་པོ་འདི་ཚོས་སྔ་འགྱུར་གཏེར་མའི་ཆོས་དག་མ་རྣམས་ཀྱི་ཕྲིན་ལས་དང་མཛད་པ་ལ་ཅི་ཙམ་གནོད་ཀྱིན་ཡོད་པ་ལ་བསམ་གཞིག་རེ་བྱས་ཚེ། སྙིང་ནས་མཆི་མ་དཀུ་བཞིན་སོར་བཅུའི་ཐལ་མོ་སྙིང་གར་སྦྱར་ནས་ཞུ་འདོད་པ་ནི། གལ་ཏེ་ཡི་དམ་ལྷག་པའི་ལྷས་རྗེས་སུ་བཟུང་བའི་མཐུ་ལས་བྱུང་བར་ཁས་འཆེ་དགོས་པའམ། ཡང་ན་གཏེར་ཆོས་སུ་མིང་འདོགས་དགོས་ཀི་ཡོད་ན། ཐོག་མར་ཞུ་དག་ཡག་པོ་ཞིག་བྱས་ཚར་རྗེས་ད་གཟོད་འགྲེམ་སྤེལ་གནང་རོགས་ཞུ་ཞུ་ཞུ།། །།
གལ་ཏེ་ཡིག་ནོར་དོན་ནོར་ལུང་པ་གང་བཀྲམ་ནས་ལྷག་པའི་ལྷའི་བྱིན་རླབས་ལས་བྱུང་བས་སྒྲོ་བཏགས་པ་ཡིན་ན། གཞན་དག་ཚོའི་སེམས་ལ་དག་ཡིག་ཙམ་ཡང་མི་མཁྱེན་པའི་ཡི་དམ་གྱི་ལྷ་ཞིག་ཡོད་པ་ཡ་མཚན་ཆེ་བསམ་སྲིད་པས་ཀུན་གྱིས་དགོངས་པ་བཞེས་རོགས།
དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ཟླ་༡༢ཚེས་༡༠ལ།
རྒྱ་ཡིག 我不得不說
དབྱིན་ཇིའི་ཡིག I Can’t Help but Speak Out
Facebook link
