རྡུལ་བྲལ་བདེ་བ་ཆེན་པོ་གཤིས་ཀྱི་འཇམ་དཔལ། །
དམར་སེར་འོད་སྟོང་འཕྲོ་བ་དཔེ་ཡི་འཇམ་དཔལ། །
རྒྱལ་ཀུན་སྤྲོ་བསྡུའི་འཇམ་དཔལ་རབ་གསལ་ཟླ་བ། །
ང་ལ་འདུ་བྲལ་མེད་པ་སྔོར་ནས་ཤེས་ཡོད། །

གྲུབ་བརྒྱའི་་གཙུག་རྒྱན་བི་མ་མི་ཏྲ།།
ཡེ་ཤེས་སྒྱུ་མའི་སྐུ་རུ་བཞེངས་པ།།
ཕ་རྒན་བླ་མ་པདྨ་ནོར་བུ།།
མི་འབྲལ་སྤྱི་བོའི་རྒྱན་དུ་བཞུགས་དང་།།

ད་ལྟའི་སྣང་བ་འདི་ཡི་ཕ་རོལ་ན། །
ལྷ་ཞིག་གསར་དུ་བཟོས་ནས་བསྒོམ་རྒྱུ་མེད། །
སེམས་ཀྱི་རང་བཞིན་ངོས་བཟུང་བྲལ་བ་འདི། །
རྟོགས་ན་དུས་གསུམ་སངས་རྒྱས་དགོངས་པ་ཡིན། །

ཆམ་གྱིས་ཞོགས་ལ་ཅེར་གྱིས་ལྟོས་དང་།།
ཡེ་གྲོལ་ཀ་དག་ཆོས་སྐུའི་དགོངས་པ།།
ལྷང་ངེ་ལྷན་ནེ་ལྷམ་མེར་འཆར་འོང་།།
དེ་དུས་དྲན་པའི་རང་ཚུགས་མ་འཆོར།།

ཕ་རྒན་བླ་མ་རྡོ་རྗེ་འཆང་ཆེན།།
ཐུགས་རྗེ་ཉེ་རིང་མེད་པ་གཟིགས་བཞིན།།
གསོལ་འདེབས་བུ་ལ་ལྷག་ཏུ་སྐྱོབས་ནས།།
མགོན་ཁྱེད་གང་བཞུད་དགྱེས་བཞིན་ཁྲིད་མཛོད།།

འདི་ཞེས་འཛིན་པ་ནི་མ་ཤོར།།
གཉིས་འཛིན་རང་སྣང་དུ་དེངས་སོང་།།
ལྟ་སྒོམ་བློས་བྱས་ལ་མ་བརྟེན།།
རིག་པ་ཡེ་གྲོལ་དུ་འདུག་གོ།