བདེན་ངེས་མེད་པའི་འོལ་ཚོད་ཀྱི་གཏམ།

དྲིན་ཅན་རྩ་བའི་བླ་མ་མཁྱེན་ནོ།

༼ བདེན་ངེས་མེད་པའི་འོལ་ཚོད་ཀྱི་གཏམ། ༽

༄།   །སྣང་བ་སྣ་ཚོགས་ཇི་ལྟར་སྣང་ཡང་དེ་ལ་བཟང་ངན་གྱི་འཛིན་པ་མ་ཞུགས་ན།   ལྟ་བའི་ཚད་མཐོན་པོར་སླེབས་པའི་རྟགས་ཡིན།   མ་ཡེངས་ཙམ་གྱི་ངང་ནས་སེམས་ལ་ལྷོད་ཅིག་འབབ་ཀྱིན་འདུག་ན།   སྒོམ་པའི་ཚད་མཐོན་པོར་སླེབས་པའི་རྟགས་ཡིན།   བྱ་བ་ཅི་བྱས་ཀྱང་གཞན་དོན་ཁོ་ནར་འགྱུར་གྱིན་འདུག་ན།   སྤྱོད་པའི་ཚད་མཐོན་པོར་སླེབས་པའི་རྟགས་ཡིན།   བླ་མ་ལ་སངས་རྒྱས་དངོས་ཀྱི་འདུ་ཤེས་དུང་དུང་ངེ་བ་ཞིག་འབྱུང་གིན་འདུག་ན།   ཉམས་ལེན་ཚད་མཐོན་པོར་སླེབས་པའི་རྟགས་ཡིན།   ཆགས་སྡང་སོགས་ཉོན་མོངས་པ་ཀུན་མགོ་ནོན་པ་ཞིག་བྱུང་ན།   ཆོས་དང་རང་རྒྱུད་འདྲེས་པའི་ཚད་མཐོན་པོར་སླེབས་པའི་རྟགས་ཡིན།   འཁོར་འདས་གང་ལ་ཡང་རེ་དོགས་ཁུ་འཕྲིག་འདི་ཡལ་སོང་ན།   འབྲས་བུའི་ཚད་མཐོན་པོར་སླེབས་པའི་རྟགས་ཡིན།   དེ་མིན་ཅང་མི་ཤེས།

དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ཟླ་༡༠ཚེས་༡༦ལ་ཕུལ།

རྒྱ་ཡིག   不真實的廢話
དབྱིན་ཇིའི་ཡིག   Imagined Rubbish
Facebook link