བླ་མ་མཁྱེན། བླ་མ་མཁྱེན། བླ་མ་མཁྱེན། བླ་མ་རང་མཁྱེན་ནོ།།
འདི་ཞེས་འཛིན་པ་ནི་མ་ཤོར།།
གཉིས་འཛིན་རང་སྣང་དུ་དེངས་སོང་།།
ལྟ་སྒོམ་བློས་བྱས་ལ་མ་བརྟེན།།
རིག་པ་ཡེ་གྲོལ་དུ་འདུག་གོ།
སྤངས་བླང་ཨ་འཐས་ཀྱི་ཞེན་པ།།
ལྟོས་བཞག་རེ་དོགས་ནི་མ་དགོས།།
རྫོགས་ཆེན་ཉམས་ལེན་གྱི་བུ་ཆུང་།།
ཆོས་ཟད་བློ་ཟད་དུ་ཐལ་སོང་།།
ཆོས་ཉིད་བསམ་བརྗོད་ལས་འདས་དུས།།
གང་ཤར་ཆོས་སྐུ་རུ་འདུག་གོ།
བཅོས་བསླད་མ་བྱས་པའི་སེམས་ཉིད།།
སངས་རྒྱས་མངོན་སུམ་དུ་འདུག་གོ།
བརྒྱད་ཁྲི་བཞི་སྟོང་གི་བརྗོད་ཀྱང་།།
ཆོས་ཉིད་བརྗོད་མེད་དུ་འདུག་གོ།
འབུམ་ཕྲག་དྲུག་ཅུ་ཡི་སྒྲུབ་ཀྱང་།།
ལྷ་དང་རང་སེམས་ནི་དབྱེར་མེད།།
ཚོགས་དྲུག་འཕྲོ་འདུ་ལས་འདས་ཀྱང་།།
ཐ་སྙད་རང་སྣང་གི་རྩལ་ལས།།
རོལ་པ་རྟེན་འབྲེལ་གྱི་སྣང་ངོ་།།
ཕན་མེད་གནོད་མེད་དུ་གྲོལ་སོང་།།
རྒྱུད་ལུང་མན་ངག་གི་ཐོས་བར།།
དགྲ་ལྟར་སྡང་སྡང་ནི་མ་དགོས།།
བླུན་སྒོམ་ཐེ་ཚོམ་གྱི་དབུལ་བས།།
ཟོག་པོ་ཡོད་དོགས་ལ་མི་རེ།།
ཀུན་བཏགས་ཐ་སྙད་ཀྱི་ཆོས་ལ།།
ཨ་འཐས་གྲགས་སྐོམ་ལ་རྔམས་ནས།།
ཆོས་བརྒྱད་འདུ་འཛི་ཡི་གྲོང་ནས།།
མགོ་བསྐོར་ཆོས་ཚོང་ནི་མ་བྱས།།
ལྟ་བ་སྟོང་ཉིད་དུ་རྟོགས་ཀྱང་།།
ལྟ་བ་ཞེན་པ་དང་མ་བྲལ།།
གྲུབ་གྲུབ་རྣལ་འབྱོར་གྱི་ལད་མོ།།
མཐོ་མཐོ་ཟབ་མདོག་ནི་མ་ངོམས།།
སྐྱབས་ཀུན་དྲི་མེད་ཀྱི་འོད་ཟེར།།
རྣམ་དབྱེར་མེད་པར་དུ་བཞུགས་པ།།
བཀའ་དྲིན་སུམ་ལྡན་གྱི་བླ་མའི།།
བརྒྱུད་གསུམ་བྱིན་རླབས་ཀྱི་ཆུ་རྒྱུན།།
སྙིང་དབུས་མི་ཤིག་གི་འཁོར་ལོ།།
མ་ལུས་ལྷག་ལྷག་ཏུ་འབབས་སོང་།།
སྒོ་ལ་འདམ་སྦྱར་གྱི་མཚམས་ཞེས།།
སྡུག་ཡུས་བགྲང་རུས་ཞིག་མེད་ཀྱང་།།
གཉུག་མའི་ཡེ་ཤེས་ལ་སྦར་སྙབ།།
མ་དགོས་རྟོགས་པ་འདི་ངོ་མཚར།།
འབད་རྩོལ་དབེན་པ་ཡི་ལུས་ལ།།
བྱར་མེད་རང་སེམས་འདི་གཅིག་པུ།།
གཡེང་མེད་གཏད་མེད་ཀྱི་མཚམས་ནི།།
མ་བསྡད་ཟེར་རྒྱུ་ཡང་མི་འདུག།
ས་རྡོ་ཡོད་མེད་ལ་བསྒྱུར་བའི།།
རྫུ་འཕྲུལ་གྲུབ་རྟགས་ནི་མེད་མོད།།
ཚེ་འདི་ཆོས་སྐུ་ཡི་གཏན་སྲིད།།
མི་ཐོབ་བསམ་པ་ཞིག་མེད་ལགས།།
འཁྲུལ་དུས་འཁྲུལ་རང་དུ་ཆུག་ཅིག།
ཉིང་འཁྲུལ་རྒྱ་འབྱམས་སུ་མ་གཏོང་།།
གྲོལ་དུས་དེ་ཀ་རང་གྲོལ་ཆུག།
གྲོལ་མཁན་གཞི་མེད་དུ་ཡལ་དགོས།།
གདོད་མའི་གཤིས་ཐོག་ལ་སླེབས་དུས།།
གཞི་ལམ་འབྲས་གསུམ་གྱི་དབྱེ་བ།།
མཉམ་ཉིད་བློ་འདས་ཀྱི་དོན་ལ།།
བརྗོད་བྱ་བརྗོད་ཡུལ་ལས་འདས་སོང་།།
ཨ་ལ་ལ་ཧོ་ནི་རེ་དགའ།།
ཡིད་དཔྱོད་གྲུབ་མཐའ་ལ་མ་བརྟེན།།
ཀློང་ཆེན་རབ་འབྱམས་ཀྱི་བུ་རྒྱུད།།
སྐྱིད་ཉལ་ཅི་ལ་ནི་མི་ཆོག།
ཨ་ལ་ལ་ཧོ་ནི་རེ་དགའ།།
སྡུག་བརྩིར་སྲུང་སྡོམ་ལ་མ་ཞེན།།
ཀློང་ཆེན་རབ་འབྱམས་ཀྱི་བུ་རྒྱུད།།
གང་བྱུང་ཅི་ལ་ནི་མི་ཆོག།
ཨ་ལ་ལ་ཧོ་ནི་རེ་དགའ།།
གུ་ཡངས་ཉམས་ལེན་ཞིག་བྱས་པས།།
གུ་ཡངས་མི་ཚེ་འདི་སྐྱེལ་བཞིན།།
གུ་ཡངས་གཏན་སྲིད་ལ་ཆོས་འགྲོ།།
སྡུག་བསྲན་སྒོམ་སྒྲུབ་གྱི་རྒྱུ་ལས།།
བདེ་འབྲས་སངས་རྒྱས་ཞིག་ཨེ་སྲིད།།
རྒྱུ་འབྲས་ཚུལ་བཞིན་དུ་སྨྲ་བ།།
ཀུན་མཁྱེན་བརྒྱུད་འཛིན་ལས་སུ་འདུག།
ཡར་ལྟོས་ཆོས་ཉིད་ཀྱི་མཁའ་ལ།།
བརྒྱུད་གསུམ་ཉིན་བྱེད་ཡི་དབང་པོ།།
མ་རིག་མུན་པ་ཀུན་སེལ་ཞིང་།།
གླིང་བཞི་བསྐོར་བ་འདི་མཐོང་ཚེ།།
བུ་ཆུང་མེ་ཁྱེར་གྱི་སྣང་བས།།
ལད་མོ་གླུ་ཆུང་ཞིག་ཤོར་སོང་།།
མངོན་སུམ་རྟོགས་པ་ནི་ལྟ་ཅི།།
མྱོང་བ་སྣེ་ཙམ་ཞིག་མེད་མོད།།
ཆོས་སྐུ་ཡེ་ཤེས་ཡི་རྡོ་རྗེ།།
ལོངས་སྐུ་མདོ་སྔགས་ནི་གླིང་པ།།
སྤྲུལ་སྐུ་པདྨ་ནི་ནོར་བུ།།
རིག་སྲས་ཕྲིན་ལས་ནི་ནོར་བུ།།
ཡིད་དཔྱོད་འདས་ཟིན་གྱི་མན་ངག།
རང་ངོ་རང་ཐག་ཏུ་བཅད་ཡོད།།
འདི་ལྟར་ང་རྗེས་བཞིན་ཤོག་དང་།།
ཚེ་གཅིག་ལུས་གཅིག་ལ་གྲོལ་བའི།།
གྲགས་ཅན་སངས་རྒྱས་ཀྱི་གོ་འཕངས།།
ཁ་སྣ་བར་དེ་རང་འདུག་གོ།
མཆོག་སྤྲུལ་སྨྱོན་པས་བླ་མ་དྲན་སེམས་སྐྱིད་སྣང་བ་དངས་སང་ངེ་བ་ཞིག་བྱུང་སྐབས་བྲིས་པ་དགེའོ།། །། 1988 / 1 / 15 ཉིན་མཆོག་སྤྲུལ་སྨྱོན་པ་ནས། འཆར་རན་ནམ་མཆོག་གི་རིག་པ་ནས་ཡིག་གེར་ཕབས།
རྒྱ་ཡིག 瘋子心情曲
