ཆང་འདི་ཞབས་ཏག་རྒྱག་གྱིན།།
སྣ་ཐ་སེན་གང་འཐེན་དུས།།
སེམས་ལ་འཁྲུལ་བ་མེད་ཀྱང་།།
མི་ཁ་མང་པོ་སྡང་གི།
བོད་མོར་གཡས་ནས་འཇུ་ཞིང་།།
རྒྱ་མོ་པང་ལ་བཞག་དུས།།
ང་ལ་འཇིགས་སྐྲག་མེད་ཀྱང་།།
མཐོང་མཁན་སྐྱུགས་མེར་ལང་གི།
གསེར་ཁྲིའི་མཐོན་པོའི་ཐོག་ལ།།
དབང་བསྐུར་ཆོས་བཤད་བྱེད་དུས།།
འཇིག་རྟེན་ཆོས་བརྒྱད་མེད་ཀྱང་།།
འཁྲབ་སྟོན་པ་ཞིག་མཐོང་གི།
ཆང་ཁང་སྐྱིད་པོའི་ནང་ལ།།
ཞབས་བྲོ་ལྡེམས་ལྡེམས་རྒྱག་དུས།།
སེམས་ལ་འཛིན་པ་མེད་ཀྱང་།།
བསྟན་བཤིག་འདྲ་པོ་མཐོང་གི།
མདུང་ཅོག་གྲུ་བཞི་སྟེང་དུ།།
མ་ཅང་ཛི་མོག་བརྒྱབ་དུས།།
ཐོབ་ཤོར་རེ་རྔམས་མེད་ཀྱང་།།
རྐྱལ་སྟོང་འདྲ་པོ་མཐོང་གི།
རྫོགས་ཆེན་གླིང་གི་ནང་དུ།།
གནས་ལུགས་ཇི་བཞིན་བཤད་དུས།།
ཕན་སེམས་མ་གཏོགས་མེད་ཀྱང་།།
ཁ་ཧོབ་ཅན་ཞིག་མཐོང་གི།
གླིང་ཁ་མཛེས་པོའི་ཁྲོད་ལ།།
ཇ་འཐུང་དགོད་སྒྲ་སྡིར་སྡིར།།
གུ་ཡངས་ཅན་ཞིག་ཡིན་ཏེ།།
མདོ་མེད་འདྲ་པོ་མཐོང་གི།
ལྟ་བ་མཐའ་དང་བྲལ་འདུག།
སྒོམ་པ་དགག་བསྒྲུབ་འདས་སོང་།།
སྤྱོད་པ་སྤང་བླང་བྲལ་ཀྱང་།།
རྫུན་མ་འདྲ་པོ་མཐོང་གི།
ལྟ་བྱ་སྟོང་ཉིད་བཅིག་ལ།།
བདེན་བདེན་རྫུན་རྫུན་མཐོང་གི།
གནས་ལུགས་སྐྱོན་ཅན་མིན་ཏེ།།
བལྟ་མཁན་ཁོ་རང་སྐྱོན་རེད།།
གྲུབ་ཆེན་བི་རུ་པ་དང་།།
བོད་ཀྱི་མར་པ་ལོ་ཙ།།
ལོ་རྒྱུས་ཞིབ་ཏུ་ལྟོས་དང་།།
ཆང་མཁན་ཀྱང་ཀྱང་རེད་འདུག།
དཔལ་ཆེན་ས་ར་ཧ་བ།།
གྲུབ་ཐོབ་ཀུ་ཀུ་ར་ཛ།།
གཏམ་རྒྱུད་དེ་ཚོར་གཟིགས་དང་།།
རྒྱོ་མཁན་ཀྱང་ཀྱང་རེད་འདུག།
རང་བྱུང་རིག་པའི་རྡོ་རྗེ།།
རྫོགས་ཆེན་སྤོ་མདའ་མཁན་པོ།།
མཇལ་མཁན་ཚོ་ལ་དྲིས་དང་།།
དུ་འཐེན་ཤ་སྟག་རེད་འདུག།
ཀུན་རྫོབ་འདྲ་བོ་འདྲ་པོ།།
དེ་ལ་བསྟུན་ནས་འགྲོ་ཡོད།།
དོན་དམ་བདེན་པའི་འོག་ན།།
ང་ཁྱེད་བཤད་ས་འདུག་གས།།
མཆོག་སྨྱོན་ནས་སྤྱི་ལོ་༢༠༢༢ཟླ་༡༡ཚེས་༡༧ལ་གསུངས། མཆོག་རྡོ་རྗེ་ནས་ཡི་གེར་བཏབ། མཆོག་རིག་པ་ནས་དག་བཅོས་བྱས།
རྒྱ་ཡིག 一杯茅台乾了
