༼ རིག་སྟོང་ཡེ་ཤེས་རྗེན་པར་སྟོན་པའི་མཆིད་ལན་གསེར་གྱི་མེ་ཏོག ༽
༡ ༽ ༄། །ཨེ་མ་སྐལ་ལྡན་དལ་ཅིག་བདག་ལ་གསོན།། ད་ལྟའི་རང་གི་སེམས་ལ་ལྟོས་ཤིག་དང་།། གོ་མ་འགགས་པ་ད་ལྟའི་ཤེས་པ་འདི།། རིག་པ་ཡེ་ཤེས་ཆེན་པོ་འདི་ལས་མེད།།
༢ ༽ དེ་ནས་ཕར་ལ་གཟིགས་དང་རིགས་ཀྱི་བུ།། ཇི་ལྟར་མཚོ་ལ་གཟའ་སྐར་བཀྲ་བ་བཞིན།། སྣང་བ་ལྷུན་གྲུབ་སྐུ་དང་ཞིང་ཁམས་རྣམས།། ཤར་བ་ཙམ་འདི་གསལ་བའི་རང་བཞིན་ལགས།།
༣ ༽ གཉིས་འཛིན་ཅན་ངོར་སེམས་རིག་འབྱེད་པ་ལས།། སེམས་ཉིད་ཅི་བཞིན་རྟོགས་པའི་རྣལ་འབྱོར་ངོར།། ད་ལྟ་མཐོང་བའི་གསལ་ལེ་ཧྲིག་གེ་ལས།། སེམས་དང་རིག་པའི་ཐ་སྙད་དབྱེ་རྒྱུ་མེད།།
༤ ༽ བདེ་གཤེགས་སྙིང་པོ་ཞེས་པའི་སྒྲ་ཆེན་པོ།། འགྲོ་བ་ཀུན་ལ་ཡེ་ནས་ལྷུན་གྱིས་གྲུབ།། ལུས་སེམས་གང་དུའང་མི་གཏོགས་དེ་མི་འབྲལ།། བསམ་གྱིས་མི་ཁྱབ་ཚུལ་གྱིས་བཞུགས་ནས་ཡོད།།
༥ ༽ ས་རྡོ་རི་བྲག་སྣང་བ་སྣ་ཚོགས་ཀུན།། སྣང་ཙམ་ཉིད་ནས་གཤིས་ལས་གཡོ་མ་མྱོང་།། རང་སྣང་ཆོས་ཉིད་རྟོགས་པའི་སྒོམ་ཆེན་ངོར།། ཐམས་ཅད་ཡེ་སངས་རྒྱས་པའི་ངོ་བོར་བཞུགས།།
༦ ༽ དབྱིངས་ཀྱི་རིག་པ་ལུང་མ་བསྟན་གཡོས་ཏེ།། གློ་བུར་འཁྲུལ་བས་སེམས་ཅན་གསར་དུ་སྐྱེས།། འཁྲུལ་ཙམ་ཉིད་ནས་དྲི་མ་འབྲལ་རུང་དུ།། གནས་ཕྱིར་གློ་བུར་སྒྲ་འདི་བརྗོད་དུ་རུང་།།
༧ ༽ ཆོས་རྣམས་ངོ་བོས་སྟོང་ཉིད་ཡིན་པའི་ཕྱིར།། ཟ་ལྟར་སྣང་ལ་འདོར་བ་ལྟར་དུ་སྣང་།། སྣང་བའི་ས་རུ་སྣང་བ་མ་གྲུབ་ཀྱང་།། སྣང་བ་རྟེན་འབྲེལ་དུ་མའི་ཚུལ་དུ་འཆར།།
༨༽ དེ་ལྟར་རང་ལ་མྱོང་བ་མེད་ན་ཡང་།། བརྒྱུད་གསུམ་བླ་མའི་ཞལ་རྒྱུན་རིན་པོ་ཆེ།། ཕ་ནོར་བུ་ལ་འཕྲོད་པའི་ངང་ཚུལ་གྱིས།། སྦ་གསང་མེད་པར་ཁྱེད་ལ་ཞུས་པ་ཡིན།།
ཞེས་པའང་དཔལ་ཡུལ་དར་ཐང་དགོན་པའི་རྒྱ་ཞག་མཁན་པོ་ཆོས་སྐྱབས་མཆོག་ནས། བྲིས་ལན་རྟོགས་འབུལ་གྱི་ཚུལ་དུ་གནང་བ་ལ། གུས་པ་རང་ནས་ཀྱང་དད་གུས་སྤྲོ་བ་ཚད་མེད་ཀྱི་ངང་ནས། སླར་ཡང་ཁྱེད་ལ་རྫོགས་ཆེན་རང་ལུགས་ལྟར་བཀྲལ་ནས་མཆིད་ལན་དུ་ཕུལ་བ་དོན་དང་ལྡན་པར་གྱུར་ཅིག། མཆོག་སྨྱོན་ནས་སྤྱི་ལོ་༢༠༢༠ཟླ་༡༡ཚེས་༢༤ལ།
བརྒྱུད་བསྐུར། Facebook མཆོག་པཎ།