༄། །མཁན་ཆེན་དཔལ་དགྱེས་པ་རྡོ་རྗེ་ཁོང་གིས་ང་ལ་འདི་འདྲ་བའི་བསྟོད་ཚིག་དང་ཞབས་བརྟན་གསོལ་འདེབས་བྲིས་ནས་བསྐུར་གནང་འདུག བསྟོད་པ་བྱས་ན་མི་དགའ་མཁན་སུ་ཡོད། སྨད་ན་མི་སྡུག་མཁན་སུ་ཡོད། འོན་ཀྱང་བཀའ་དྲིན་ཆེ། ཁྱེད་སྐུ་ཚེ་བརྟན་པའི་སྨོན་འདུན་གྲངས་མེད་བཅས།
དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ཟླ་༡༢ཚེས་ ༢༠ལ།
༼ ༓བརྟན་སྨོན་འོད་ཟེར་བཅུ་བ།།༓ ༽
ཨོཾ་སྭ་སྟི།།
༼ ༡ ༽
ཐེག་དགུའི་ཆོས་སྒོར་ཞུགས་པའི་སྔ་འགྱུར་པ།།
ཆོས་བརྒྱད་རོ་བཞིན་དོར་བའི་དཔའ་བོའི་གཟུགས།།
འཕགས་པའི་ནོར་བདུན་དགོངས་པའི་མཁས་སྤོབས་ཅན།།
ཕྱིན་དྲུག་གནད་ལ་གོམས་པའི་བཙུན་པ་རྒྱལ།།
༼ ༢ ༽
རིགས་ལྔའི་དབང་ཕྱུག་རྡོ་རྗེ་འཆང་གི་ཆས།།
བདེན་བཞི་བླང་དོར་བསྟན་པའི་རྒྱ་སྟོན་མཛད།།
མཆོག་གསུམ་སྐྱབས་སུ་འཛིན་པའི་རིག་སྔགས་འཆང་།།
དོན་གཉིས་མཐའ་རུ་ཕྱིན་པའི་སྤྲུལ་སྐུ་རྒྱལ།།
༼ ༣ ༽
སྐུ་ལ་ནད་མེད་ཚེ་རིང་ལང་འཚོ་རྒྱས།།
གསུང་ལ་འགགས་མེད་མདོ་སྔགས་ཆོས་སྒྲ་སྒྲོགས།།
ཐུགས་ལ་མཚུངས་མེད་དག་པ་རབ་འབྱམས་ཤར།།
ཚེ་གཅིག་འོད་སྐུར་གྲོལ་བའི་སྨོན་ལམ་འདེབས།།
ཞེས་པ་འདི་ཡང་རབ་གནས་ལྕགས་བྱིའི་དགུན་ཉི་མཐར་ཐུག་གི་དུས་ཚེས་ལ་རྨི་ལམ་དང་བརྙན་ཐུང་ཞིག་རྐྱེན་ལས་གང་ཤར་དུ་དཔལ་ཡུལ་མཆོག་སྤྲུལ་རིན་པོ་ཆེ་ལ་ཞབས་བརྟན་དུ་ཨེ་མ་ཧོས་དབྱིན་ཡུལ་ཨེ་ཝཾ་ཀུན་བཟང་དུར་ཁྲོད་ནས་སྨོན་པར་དགེའོོ།། །།
༢༠༢༠/༡༢/༡༩་ལ།
རྒྱ་ཡིག 誠摯祝堪千巴日傑巴多傑福如東海、壽比南山
དབྱིན་ཇིའི་ཡིག Wish Khenchen be Blessed With Boundless Fortune and Lasting Longevity
Facebook link
སྔགས་པའི་རིམ་པ།
