༼ ང་ལུང་གིས་ཟིན་འདུག ༽
༄། །དེང་སང་དུས་ཀྱི་བཤེས་གཉེན་ཕལ་བ་འགའ།།
བཙན་ཕྱུག་གོ་ས་མཐོན་པོའི་མི་ལ་དགའ།།
གདམས་ངག་ཞུ་འདོད་མེད་ཀྱང་ངས་སྦྱིན་ཟེར།།
ཆོས་ཀྱི་ཕྱག་རྟེན་ཐོགས་ནས་རྗེས་ལ་སྙེགས།།
ཞེས་དང་།
ཆོས་པ་ཡིན་མདོག་ཆོས་བརྫུའི་བསླུ་བྲིད།།
ཆོས་གཏམ་གཏོང་བ་དེང་སང་མང་སྟེ།།
ཆོས་བཞིན་སྤྱོད་འདོད་སེམས་ཀྱི་རྣམ་རྟོག།
ཆོས་མཐུན་ཤར་ན་ངོ་མཚར་ཆེའོ།།
ཞེས་དང་།
ཉིན་མོ་སེར་གོས་གྱོན་ནས་དཀོར་ལ་ཟ།།
མཚན་མོ་ཆང་འཐུང་བུད་མེད་སྟེང་དུ་རྩོད།།
ངན་སྤྱོད་སྣ་དགུ་བྱེད་གྱིན་ངོ་སོ་མཐོ།།
ད་དུང་ཨུ་འུས་བསྟན་པ་དར་ཞེས་གླེང་།།
ངོ་ཚ་མི་ཤེས་བ་གླང་མི་ཐོད་ཅན།།
འདི་མཐོང་སྐྱོ་བ་མི་འཕེལ་སེམས་ལྡན་སུ།།
ཞེས་གསུངས་པ་ལྟར།
དཔལ་སྤྲུལ་རྡོ་རྗེ་འཆང་གི་ལུང་བསྟན་ནང་དུ་ང་རང་གི་ཕྱི་ནང་གསང་གསུམ་གསལ་བོར་བྲིས་འདུག་པས་སྐྱབས་སུ་མཆི། གསུང་འདི་མཇལ་མ་ཐག་རང་གིས་རང་ལ་བལྟས་པས་ཇི་མ་ཇི་བཞིན་དུ་འདུག ང་རང་ལུང་གིས་ཟིན་པ་ཡིན་པར་ཡིད་ཆེས་ཐོབ་སོང་། ཀུན་གྱིས་གཟིགས་མོ་མཛད་པར་ཞུ།
དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ཟླ་༡༡ཚེས་༢༢ལ།
རྒྱ་ཡིག 我找到我的授記文
དབྱིན་ཇིའི་ཡིག I Have Found the Prophecy of Me
བརྒྱུད་བསྐུར། Facebook
མཆོག་སྨྱོན་པའི་ཚུལ།
