avalokiteshvara20201114 ༼ ཉིན་རེར་བཞིན་བྱང་ཆུབ་སེམས་ལ་བསྟོད་པ། ༽

༼ ༦༦ ༽ ༄། །བྱང་ཆུབ་སེམས་ཀྱི་སྡོམ་ཉམས་ན།། སླར་ཡང་གསོ་བར་རུང་བ་སྟེ།། རིན་ཆེན་དང་པོའི་གསེར་ཆག་ཀྱང་།། སྔར་བཞིན་གསོ་བར་དཀའ་བ་མེད།།

༼ ༦༧ ༽ ཁྲོ་བས་རང་རྒྱུད་སྲེག་པ་དང་།། ཕྲག་དོག་ལུས་སེམས་མི་བདེ་བསྐྱེད།། དེ་ཡི་གཉེན་པོ་མཆོག་གྱུར་པ།། རྨད་བྱུང་བྱང་ཆུབ་སེམས་འདི་ཡིན།།

༼ ༦༨ ༽ རྡོ་ལ་ཞབས་རྗེས་ཕྱག་རྗེས་དང་།། མཁའ་ལ་འཕུར་དང་ཆུ་ལ་རྒྱུགས།། དུད་འགྲོ་ལ་ཡང་ཡོད་པས་ན།། གྲུབ་རྟགས་མཆོག་ནི་བྱང་སེམས་ཡིན།།

༼ ༦༩ ༽ ཐོས་པ་འདོད་ན་བྱང་སེམས་སློབས།། བསམ་པར་འདོད་ན་བྱང་སེམས་སློབས།། སྒོམ་པར་འདོད་ན་བྱང་སེམས་སློབས།། བསླབ་བྱའི་གཙོ་བོ་བྱང་སེམས་ཡིན།།

༼ ༧༠ ༽ དགྲ་གཉེན་བར་མའི་སེམས་ཅན་ལ།། ཕ་མའི་འདུ་ཤེས་བསྐྱེད་ཐུབ་ན།། བྱང་ཆུབ་སེམས་མཆོག་རིན་པོ་ཆེ།། རྒྱུད་ལ་སྐྱེ་བར་ཐག་མི་རིང་།།

དཔལ་ཡུལ་མཆོག་སྤྲུལ་མིང་འཛིན་ནས་ སྤྱི་ལོ་༢༠༢༠ཟླ་༡༢ཚེས་༣༠ནས་ལོ་༢༠༢༡ཟླ་༡ཚེས་༣བར་ལ་ཕུལ།

རྒྱ་ཡིག   菩提心讚頌 66 – 70 དབྱིན་ཇིའི་ཡིག   Praises on Bodhicitta 66 – 70 བྱང་ཆུབ་སེམས་དཔའི་སྤྱོད་པ་ལ་འཇུག་པ། བྱང་ཆུབ་སེམས་ལ་བསྟོད་པའི་རིམ་པ།