༼ ཀ་མད་སུམ་ཅུ་ལུགས་ལྡོག་གི་སྙིང་གཏམ་འཁོར་བ་ཕྱིར་ལྡོག་གི་གདམས་པ། ༽
༄།། ཨ་ཁུ་ཨ་ནེ་སེར་ཁྱིམ་པ་སོགས་ཀྱིས།།
ཧ་ཅང་སེམས་པ་དཀར་བའི་གཏམ་འདིར་གསོན།།
ས་གསུམ་འགྲོ་བའི་སྐྱབས་གནས་དཀོན་མཆོག་གསུམ།།
ཤ་ཚའི་བདག་ཉིད་སྤྱན་རས་གཟིགས་མ་བརྗེད།།
ལ་རྒྱའི་དོན་གོ་སྙིང་པོ་མ་ཎི་སྒྲོངས།།
རྭ་འདྲའི་རང་རྒྱུད་གྱོང་པོ་ཆོས་ཀྱིས་ཐུལ།།
ཡ་མ་ར་ཙ་བསླེབས་ཚེ་མི་འགྱོད་ཅིང་།།
འ་འུར་མེད་ཀྱང་ཆོས་དང་སེམས་འདྲེས་ན།།
ཟ་ལུགས་འཐུང་ལུགས་སྤྱོད་ལམ་ཅི་འདྲ་ཡང་།།
ཞྭ་གོས་ལྷམ་གསུམ་འཛོམས་ལྟར་དྲོད་ཅིག་འོང་།།
ཝ་སྐྱེས་བཞིན་དུ་ངན་སེམས་མི་འཆང་བར།།
ཛ་ཡ་རྒྱལ་བའི་གསུང་ལ་ཡིད་ཆེས་གྱིས།།
ཚ་གྲང་དཀའ་བ་ཁྱད་བསད་སྒྲིབ་སྦྱོང་ཕྱིར།།
ཙ་རི་ལྷ་ས་རྡོར་གདན་གནས་སྐོར་གྱིས།།
མ་རྒན་འགྲོ་བ་ཡོངས་ལ་བྱང་སེམས་སྒོམས།།
བ་གླང་ར་ལུགས་ཤ་ལ་སྲེད་པ་སྤོངས།།
ཕ་མར་མ་གྱུར་གཅིག་ཀྱང་མེད་པས་ན།།
པ་པུར་རྩོད་ཀི་མ་འདུག་དབྱེན་ཚིག་སྤོངས།།
ན་རྒས་འཆི་བ་བྱུང་ན་འགྱོད་པའི་རྒྱུ།།
ད་ལྟ་ཉིད་ནས་ཕྱི་མའི་རྒྱགས་ཕྱེ་སྒྲུབས།།
ཐ་ན་མཆོད་མེ་གཅིག་དང་ཕྱག་རྡོག་གཅིག།
ཏ་ཐ་གཱ་ཏའི་གཞུང་དང་མཐུན་པ་ཞིག།
ཉ་གང་རྒྱས་པ་ལྟ་བུའི་དཀར་པོ་ལས།།
ཇ་ཡུན་ཙམ་ལ་ནུས་ཀྱང་ཅི་ནུས་འབུངས།།
ཆ་ལུགས་ཆོས་དང་མཐུན་ན་འདི་ཕྱིར་དགེ།
ཅ་ག་འཁོར་ལོ་ཕྲེང་བ་འབྲལ་མི་རུང་།།
ང་ཚོས་དགེ་སྡིག་ཅི་ཞིག་བསགས་ན་ཡང་།།
ག་རུ་ཕྱིན་ཀྱང་རྣམ་སྨིན་མྱོང་ངེས་ཡིན།།
ཁ་ཁ་མ་ཡིན་ང་ཚོ་ལྷན་ཅིག་ཏུ།།
ཀ་དག་གདོད་མའི་ས་རུ་ཕྱིན་པར་ཤོག།
དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ཟླ་༡༡ཚེས་༢༩ལ།
བརྒྱུད་བསྐུར། Facebook
མཆོག་སྨྱོན་པའི་ཀ་རྩོམ།
- བོད་ལ་ཕུལ་བའི་བོད་ཡིག་གི་སེམས་འཕྲིན།
- སྤྲུལ་སྐུས་མཁན་པོ་ལ་བསྙད་འཚོལ་བ།
- སྤྲུལ་སྐུ་ཚོ་ང་ཚོས་ཅི་ལྟར་བྱེད་རྒྱུ་ཡིན།
- སྔགས་པ་ཚོས་ཚོད་ཟུངས་དང་དགའ།
- བོད་ཀྱི་མཁའ་འགྲོ་མ་དྲན་པའི་ངང་ཐུང་གི་གླུ་ཆུང་།
- དགའ་དད་ཀྱི་ཀློང་དུ་བཞུགས་པའི་སྐྱེས་མཆོག་ཅིག་ལ་ཕུལ་བའི་ཀ་རྩོམ།
- རབ་སྔགས་གཉིས་འཛོམས་སྔ་འགྱུར་བསྟན་འཛིན་མཐུན།
- རང་ཚུལ་དྲང་པོར་བརྗོད་པའི་གཏམ་ཞེས་བྱ་བ་བཞུགས།
- བསམ་གཏན་པའི་ཁ་སྤུ་ལས་བརྩམས་པའི་ཀ་རྩོམ།
