༼ བོད་ཀྱི་མཁའ་འགྲོ་མ་དྲན་པའི་ངང་ཐུང་གི་གླུ་ཆུང་། ༽
༄།། ཀྭ་ཡེ་གསོན་དང་བོད་ཀྱི་མཁའ་འགྲོ་ཚོ།།
ཁ་དོག་དཀར་རྩི་དམར་རྩི་བྱུག་ལ་མཁས།།
ག་ནས་བལྟས་ཀྱང་གླུ་མ་གྲགས་ཅན་འདྲ།།
ང་ཚོ་འདོད་པའི་ཆང་གིས་མྱོས་ནས་ཡོད།།
ཅ་ག་ཁ་པར་རྩེད་ལ་ཤིན་ཏུ་དགྱེས།།
ཆ་ལུགས་སྔགས་ཆས་བོད་ཆས་འདྲ་མིན་མནབ།།
ཇ་ཁང་ཀུན་ཏུ་སྐུ་པར་མཇལ་རྒྱུ་འདུག།
ཉ་པ་བཞིན་དུ་གོ་སྐབས་འཚོལ་སྙིང་འདོད།།
ཏཱ་རེ་ཁྱེད་དང་ལུས་འབྲེལ་གཅིག་བྱུང་ན།།
ཐ་ལ་ལ་མོ་འགུག་བཞིན་སྐྱིད་གླུ་ལེན།།
ད་ལྟ་ཁྱེད་ལ་དྲང་པོར་བཤད་པ་ཡིན།།
ན་ནིང་བཤད་སྙམས་སྤོབས་པས་མ་འདང་ཐལ།།
པ་ལྕོག་སྒྲོག་པའི་གནག་སྣུམ་སྐྲ་ཟུར་ནས།།
ཕ་རོལ་འགུགས་པའི་སྤྱན་ཟུར་གཡོ་མཐོང་ཚེ།།
བ་གླང་བཞིན་དུ་དབང་པོ་འགྲེངས་ན་ཡང་།།
མ་མཐོང་མདོག་བཞིན་ལྐོག་ནས་རྒྱང་བལྟས་བྱས།།
ཙ་རི་ཏྲ་སོགས་གངས་བྲག་གཡའ་སྐྱིབས་སུ།།
ཚ་གྲང་བཟོད་བསྲན་ཆོས་བཞིན་བཞུགས་མཐོང་ཚེ།།
ཛ་ཡེ་ཁྱེད་དང་འགྲོགས་རྒྱུའི་རེ་འདུན་ནི།།
ཝ་ལེ་ཝ་ལེར་ལྷག་ཏུ་དྲན་ནས་བྱུང་།།
ཞྭ་མོ་བཞིན་དུ་ཁྱེད་ཉིད་སྤྱི་བོར་བཀུར།།
ཟ་མའང་ཁྱེད་དང་ལྷན་དུ་ཟ་སྙིང་འདོད།།
འ་འུར་མེད་པའི་མགྲོན་ཁང་སྐྱིད་པོ་ནས།།
ཡ་ཆུང་སྙིང་གི་དྲོད་ལ་གླན་སྙིང་འདོད།།
ར་བ་གངས་ཅན་ལྗོངས་ཀྱི་མཁའ་འགྲོ་དང་།།
ལ་ལུང་འབུམ་ཕྲག་མང་པོས་ཆོད་ན་ཡང་།།
ཤ་ཚའི་བརྩེ་བའི་གསུང་ལན་ཕུལ་ཤོག་དང་།།
ས་ཆ་གང་དུ་བཞུགས་ཀྱང་ང་ཐོན་འོང་།།
ཧ་ཧ་ཁྱེད་ཐུགས་དགྱེས་པའི་ཞུ་མཆིད་འདི།།
ཨ་ལགས་སྨྱུག་འཛིན་མཆོག་སྤྲུལ་མིང་དེས་ཕུལ།།
དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ཟླ་༡༡ཚེས་༢༩ལ།
བརྒྱུད་བསྐུར། Facebook
མཆོག་སྨྱོན་པའི་ཀ་རྩོམ།
- བོད་ལ་ཕུལ་བའི་བོད་ཡིག་གི་སེམས་འཕྲིན།
- སྤྲུལ་སྐུས་མཁན་པོ་ལ་བསྙད་འཚོལ་བ།
- སྤྲུལ་སྐུ་ཚོ་ང་ཚོས་ཅི་ལྟར་བྱེད་རྒྱུ་ཡིན།
- སྔགས་པ་ཚོས་ཚོད་ཟུངས་དང་དགའ།
- ཀ་མད་སུམ་ཅུ་ལུགས་ལྡོག་གི་སྙིང་གཏམ་འཁོར་བ་ཕྱིར་ལྡོག་གི་གདམས་པ།
- དགའ་དད་ཀྱི་ཀློང་དུ་བཞུགས་པའི་སྐྱེས་མཆོག་ཅིག་ལ་ཕུལ་བའི་ཀ་རྩོམ།
- རབ་སྔགས་གཉིས་འཛོམས་སྔ་འགྱུར་བསྟན་འཛིན་མཐུན།
- རང་ཚུལ་དྲང་པོར་བརྗོད་པའི་གཏམ་ཞེས་བྱ་བ་བཞུགས།
- བསམ་གཏན་པའི་ཁ་སྤུ་ལས་བརྩམས་པའི་ཀ་རྩོམ།
