༼ རབ་སྔགས་གཉིས་འཛོམས་སྔ་འགྱུར་བསྟན་འཛིན་མཐུན། ༽
༄།། ཀ་ཡེ་གསོན་དང་རབ་བྱུང་སྔགས་པ་ཚོ།།
ཁ་དོག་དཀར་དམར་ན་བཟའི་ཁྱད་ཙམ་ལས།།
ག་ནས་བལྟས་ཀྱང་ལྟ་སྒོམ་སྤྱོད་གསུམ་པོ།།
ང་ཡིས་བལྟས་ན་ཁྱད་པར་མེད་པར་མཐོང་།།
ཅ་ག་རྡོར་དྲིལ་དང་ནི་འཁར་གསིལ་ཟུང་།།
ཆ་ལུགས་ངུར་སྨྲིག་དང་ནི་སྔགས་པའི་ཆས།།
ཇ་ཆུ་འོ་གསུམ་གཅིག་ཏུ་འདྲེས་པ་བཞིན།།
ཉ་རྒྱས་ཟླ་ལྟར་འཛམ་གླིང་གང་སར་མཛེས།།
ཏཱ་ཐ་ག་ཏའི་སྟོང་ཉིད་ཆེན་པོ་དང་།།
ཐ་མལ་མ་ཡིན་རང་བཞིན་འོད་གསལ་བ།།
ད་ལྟ་ཉིད་ནས་གཤིས་ལ་བཞུགས་མཐོང་ནས།།
ན་ཀི་ཟུང་འཇུག་ཀློང་ན་ཐ་དད་མིན།།
པཱ་ར་མི་ཏའི་གཞུང་དང་བསྟན་བཅོས་ཀུན།།
ཕ་རོལ་གནོན་པའི་ལག་ཆ་མི་བྱེད་ཅིང་།།
བ་གླང་ལྟ་བུའི་བརྟུལ་ཞུགས་མི་འཛིན་པར།།
མ་ལུས་ཆོས་རྣམས་ཉམས་ལེན་ལམ་དུ་ཁྱེར།།
ཙ་རི་ཏྲ་དང་ན་ལེནྡྲ་སོགས་ནས།།
ཚ་གྲང་བཟོད་ནུས་ཆོས་བཞིན་སྤྱོད་མཁས་ཚོ།།
ཛ་ཡའི་བསྟན་པ་གཅིག་གི་སློབ་མ་ལགས།།
ཝ་ལེར་བསམ་ན་སྙིང་ནས་དད་གུས་དགོས།།
ཞྭ་མོ་རྣ་རིང་ཨོ་རྒྱན་པད་ཞུ་གཉིས།།
ཟ་བྱེད་འཐུང་བྱེད་ཙམ་དུ་མི་སེམས་ཤིང་།།
འ་འུར་སྒྲོག་པའི་སྡེ་གཉིས་དཀྲུག་པའི་གཏམ།།
ཡར་མར་ཀུན་ཏུ་ཁྱབ་སྤེལ་མ་གནང་རོགས།།
ར་བ་གངས་ལྡན་ཡུལ་གྱི་རབ་སྔགས་གཉིས།།
ལ་ལུང་གང་དུ་བཞུགས་ཀྱང་མཐུན་སྒྲིལ་དང་།།
ཤ་ཁྲག་གཅིག་ཏུ་གྱུར་བའི་སྤུན་ཟླ་བཞིན།།
ས་སྟེང་འདི་རུ་དམ་ཚིག་གཅིག་ལ་རེམས།།
ཧ་ཅང་ཚིག་གི་སྡེབ་སྦྱོར་མི་སྙན་ཡང་།།
ཨ་ལགས་མཆོག་སྤྲུལ་སྙིང་གི་རེ་བ་ཡིན།།
དཔལ་ཡུལ་མཆོག་སྤྲུལ་མིང་འཛིན་ནས་སྤྱི་ལོ་༢༠༢༠ཟླ་༡༢ཚེས་༢ལ།
བརྒྱུད་བསྐུར། Facebook
མཆོག་སྨྱོན་པའི་ཀ་རྩོམ།
- བོད་ལ་ཕུལ་བའི་བོད་ཡིག་གི་སེམས་འཕྲིན།
- སྤྲུལ་སྐུས་མཁན་པོ་ལ་བསྙད་འཚོལ་བ།
- སྤྲུལ་སྐུ་ཚོ་ང་ཚོས་ཅི་ལྟར་བྱེད་རྒྱུ་ཡིན།
- སྔགས་པ་ཚོས་ཚོད་ཟུངས་དང་དགའ།
- ཀ་མད་སུམ་ཅུ་ལུགས་ལྡོག་གི་སྙིང་གཏམ་འཁོར་བ་ཕྱིར་ལྡོག་གི་གདམས་པ།
- བོད་ཀྱི་མཁའ་འགྲོ་མ་དྲན་པའི་ངང་ཐུང་གི་གླུ་ཆུང་།
- དགའ་དད་ཀྱི་ཀློང་དུ་བཞུགས་པའི་སྐྱེས་མཆོག་ཅིག་ལ་ཕུལ་བའི་ཀ་རྩོམ།
- རང་ཚུལ་དྲང་པོར་བརྗོད་པའི་གཏམ་ཞེས་བྱ་བ་བཞུགས།
- བསམ་གཏན་པའི་ཁ་སྤུ་ལས་བརྩམས་པའི་ཀ་རྩོམ།
